ЦIусса хаварду ца-кIива ххуттайну

ЦIусса хаварду ца-кIива ххуттайну

Дунияллул гъунттулу

Яла чIявуми
лихъачалт кьамул бувсса билаят
Вай гьантрай Брюсселлай хьусса дунияллул халкьуннал дянивсса конференциялий Иорданиянал кьатIаллил иширтталсса буллалисса министр Айман Сафадил бувсмунийн бувну, Сириянаву граждан дяъви байбивхьуния мукьах яла чIявуми ли­хъачалт кьамул бувмур билаят Иордания бур. Сириянава 5,6 миллион инсантуран лихъан багьну бур, миннава 1,3 миллион Иорданиянал кьамул бувну бур.


Террористътурал бюджет
Спецслужбардал, хъирив лавну, кIул бувну бур Аьрасатнаву къадагъалийсса террористътурал «ИГИЛ» группировкалул бюджет шанма миллиард евролул бушиву. Спецслужбардайн чул бивщуну, экспертътурал дур­сса хIасиллайн бувну, миксса арцу минначIан най дусса дур, Иракьнаву ва Сириянаву кьюлтIну навт бахлай, му­ттаэтурал хъус хъямала дуллай. ДачIи арцу миннал ляркъуну дур, аьлтта чIалачIисса бизнесравун инвестицияртту кIункIу дурну, масалдаран, Иракьнаву балугъирттал фермардайн арцу дачин дурну.

Чара бакъа лахьлан ниттил маз
Ва зурул 25-нний Къазаннай хьусса Татарсттаннал ПаччахIлугърал Советрал мажлисрай депутатътурал кьамул бунни школарттай татар мазрал дарсру чара бакъа лахьлан аьркинсса дарсруну ккалли буллалисса документ. Депутатътурал хьхьичIмур батIаврий маслихIат бувссия ниттил мазрал дарсру факультативрал дарсру хIисаврай лахьхьин дуллан. Аьрасатнал ПаччахIлугърал Думалул председатель Вячеслав ВолодиннучIан гьан бувансса документрай депутатътал бур «республикардай миллатир­ттал мазрал дарсру чара ба­къамину ядуван» аьркиншиврий чIурчIав дуллай.

ЦIусса премьер-министрнал цалчинсса ша
Къиргъисттаннал цIусса премьер- министр махъаллил хьунни охраналия ва кортежрая, мукунма къадагъа дунни цува даврийн наниний ххуллу лакьлан. МухIаммадкалый Абилгъазиев даврийн учIайсса ур цувалу, укунасса инсан куна.

ХIадур бувссар
П. Рамазановал

Читайте также: