Ххал бивгьунни 18 масъала

Ххал бивгьунни 18 масъала

Апрельданул 24-нний МахIачкъалалив хьусса ДР-лул Халкьуннал Мажлисрал 21-мур сессиялий ххал бивгьунни 18 масъала. Сессиялий гьуртту хьунни ДР-лул БакIчинал кIанайма Владимир Васильев.


Байбихьулий махъру лавхъунни парламентравусса партиярттал фракциярдал вакилтурал. «Справедливая Россия» партиялул вакил Рустам Кьурбановлул гьаз бунни чIявусса оьрчIру бусса кулпатирттан къулайсса шартIру дузал дуван аьркиншиврул масъала. Мунал пикрилий, Дагъусттаннай 3-мур ва хъиривми оьрчIру бувсса кулпатирттан аьркинни дулун къатта бансса аьрщарал участокру.

Мунал мукунма бувсунни билаятрал чIявусса субъектирдай региондалул бюджетрава чIявусса оьрчIру бусса кулпатирттан социал кумаг буллай бушиву, жучIавагу буллан аьркиншиву мукунсса кумаг.

Сессиялий депутатътурал рязишин дунни республикалул цаппара судирттал учас­токирттай дакьаврил судьятал битан.
Шамилчин дурккуну кьамул дунни Дагъусттаннал БакIчинал кIанайма Вла­­димир Васильевлул сипталий дурсса «Дагъусттан Республикалий къаматериалсса культуралул ирсирал объектирдал хIакъираву» тIисса закондалул проект.
КIилчин дурккуну кьамул дунни «Ля­личIину дуруччин аьркинсса тIабиаьт­рал территориярттал хIакъираву» тIисса Закондалуву дахханашивуртту даврил» проект.

КIилчин дурккуну кьамул дунни цаймигу 2 закондалул проект: «Дагъусттан Рес­публикалул Кодексраву административ аьдлу-низамрал хIакъиравусса дахханашивуртту даврия» тIисса ва «Дагъусттан Республикалий бюджетрал иширттал ва бюджетирттал дянивсса арардал хIакъираву» тIисса ДР-лул Закондалул 39-мур статьялий дахханашивуртту даврия» тIисса закондалул проект.

ХIадур бувссар ХI. Аьдиловлул

Читайте также: