Октябрьданул 5-нний ДР-лул Физкультуралул ва спортрал министерствалул 80 шин шаврин хасну Дусшиврул къатраву хьунни «Дагестан спортивный» тIисса физкультуралул ва спорт­рал форум. Форумрай гьуртту хьунни республикалул каялувчитал, Аьрасатнал Спортрал министерствалул, республикалул исполнительный властьрал органнал, СКФО-рал субъектирдал вакилтал, Олимпий тIуркIурдай хьхьичIунсса кIанттурду бувгьуми. Спортсментурахь аьла-ссалам буллай, Дагъусттаннал БакIчинал бувсунни Дагъусттаннал спортсментурал дунияллул халкьуннал аренардай ларсъсса ххувшавурттая.

Октябрьданул 1-нний «Сочи-2016» форумрал хъаттиралу Да­гъусттаннал БакIчи Рамазан АьбдуллатIипов гьуртту хьунни АьФ-лул ПрезидентначIасса ХьхьичIунмай нанаврил стратегиялул ва приоритетсса проектирдал советрал президиумрал батIаврий. БатIаву хьуссар АьФ-лул ХIукуматрал Председатель Дмитрий Медведевлул каялувшиврулу.

Октябрьданул 1-нний Сочилий дунияллул халкьуннал инвестортурал форумрай Дагъусттаннал БакIчи Рамазан АьбдуллатIипов хьунаавкьунни Китайнавасса инвестортуращал.

ДР-лул Халкьуннал Мажлисрал депутатну ЦIуссалакрал райондалия увчIунни АхIмадханнул арс Амирханов Амирхан. Амирхан увну ур 1976 шинал ноябрь зурул 3-нний МахIачкъала шагьрулий. МахIач­къала шагьрулул 13-мур школагу къуртал бувну, дуклан увххун ур Дагъусттаннал паччахIлугърал университетрал юридический факультетрайн.

Октябрьданул 4-нний «Дагестан» РИА-лий «Открытая власть» проектрал хахливу ДР-лийсса ВацIлул хозяйствалул къайгъурдалсса буллалисса комитетрал хъунаманал хъиривчу Велибек Ферзуллаевлущалсса пресс-конференция хьунни.

Дагъусттаннал УФСИН-лул спецназрал отдел «Орел» сакин хьуну 25 шин хьунни. Ва кьинилун хас дурсса шадлугърал мероприятиялий гьуртту хьунни Управлениялул ва УИС-рал идарарттал хъуними, Дагъусттаннал МВД-лул ОМОН-лул ва СОБР-лул каялувчитал, отделданул (ОСН) ветерантал, отделданул зузалтрал кулпатру.

Сентябрь зурул 28-нний ЦIуссалакрал райондалул делегация, райондалул хъунама ХIажи Айдиев бакIчину, бивунни чаннаннил металлоконструкцияр­ттал производствалуха зунтIисса заводрайн.

Ларгсса ххуллун кьини Лак­рал райондалул администрациялий ДР-лул жагьилтурал иширттал министр Арсен ХIажиевлул кьамул бунни инсантал. Министрнащал хьунабакьин бувкIминнавух бия Щардал ва Хъурхърал шяраваллал жагьилтал.