ДР-лул Халкьуннал Мажлисрал депутатну ЦIуссалакрал райондалия увчIунни АхIмадханнул арс Амирханов Амирхан.

Амирхан увну ур 1976 шинал ноябрь зурул 3-нний МахIачкъала шагьрулий. МахIач­къала шагьрулул 13-мур школагу къуртал бувну, дуклан увххун ур Дагъусттаннал паччахIлугърал университетрал юридический факультетрайн. Язи бувгьуну бур цала буттал, цIанихсса спортсмен, Амирханов АхIмадханнул ххуллу. Цимилагу хьуну ур Дагъусттаннал, Аьрасатнал ва СНГ-лул кик-боксинграл чемпион. 1996 шинал Прагалий (Чехиянаву) хьусса кик-боксинграл дунияллул чемпионатрай ларсун дур арцул медаль. 1999 шинал увцуну ур аьралуннаву къуллугъ буллан, къуллугъ буллай ивкIун ур спортрал роталуву. ЗахIматрал ххуллу байбивхьуну бур МахIачкъалаливсса хасъсса милицанал школалий дарс дихьлай. 2006 шинал хьхьичIунну дурурччуну дур юридический элмурдал кандидатнал диссертация.
Виваллил иширттал органнава лавгун ур 2009 шинал майорнал чиндалуву. Вара шинал зий айивхьуну ур Аьрасатнал Правовой академиялул Ухссавнил Ккавкказнал филиалдануву уголовно-правовой дисциплинардал кафедралул доцентну. ЧIал къавхьуну зий айивхьуну ур «Единая Россия» партиялул Дагъусттанналмур отделениялий юрист масъалартталсса буллалисса хъунама пишакарну.
2015 шинал увчIуссар Аьрасатнал Правовой академиялул Ух­ссавнил Ккавкказнал филиалданул ххисса кIулшиву дулаврил факультет­рал деканну. Му даврий зий уссар цIанасса чIумалгу.
Ва ур 40 элмийсса статьялул ва монографиялул автор. Давривусса хьхьичIуннайшивурттахлу цимилагу лайкь хьуну ур ДР-лул КIулшиву дулаврил, Юстициялул ва Виваллил иширттал министерстварттал чулухасса хIурматрал грамотарттан ва барчаллагьрал чагъардан. Лайкь хьуну ур Дагъусттан Республикалул бусравсса юристнал цIанин.
Амирханов Амирхан чялиш­сса гьурттушинна дуллай ур респуб­ликалул жяматийсса оьрмулувугу. Ва ур ДР-лул МВД-лул Жяматийсса советрал член. Лакку улча хьхьичIунмай баврил цIанийсса «Гъази-Гъумучи» тIисса фонд сакин бавривугу дуссар ванал гьур­ттушин.
Дурцуну ур щарсса, хъуни буллай ур шанма оьрчI.
«Илчи» кказитрал редакциялулгу, цинявппа бу­ккултралгу цIания дакIнийхтуну барча уллай буру Амирханнул Дагъусттаннал парламентравунсса увчIаву. ТIайлабацIу баннав!