Ларгсса ххуллун кьини Лакрал райондалул администрациялий ДР-лул жагьилтурал иширттал министр Арсен ХIажиевлул кьамул бунни инсантал. Министрнащал хьунабакьин бувкIминнавух бия Щардал ва Хъурхърал шяраваллал жагьилтал.
Щардал шяраваллил бакIчи Мирослав Ибрагьимовлул тавакъю бувна, Аьрасатнал шагьрурдай зий, ялапар хъанахъисса цала шяравучутурал каширдацIух буллай бачIи хьусса футболданий буккайсса майдан къуртал бан кабакьу бува тIий. Мува журалул тавакъю бия Хъурхърал шяраваллил жагьилтуралгу.
Гъинттул чIумал ПпабакIуйн чIявусса туристал букIлай бушивугу кIицI лавгун, Буршиял шяраватусса ишбажаранчинал тавакъю бувна кIикку туристурансса къатта бан кабакьу баву. Ванал бувсуна къатта бан дакIнийсса кIанттай туристал ликкавансса чIири-хъунсса шартIру дузал дурну душиву ва чIал къавхьуну туристал кьамул буллан бюхъантIишиву.
Министрнал махъ буллунни хьунабакьаврий сукку бувсса суаллу республикалул каялувчитурал хьхьичIун ласун, ми чулийн буккан бансса каширду лякъин.
