Дагъусттаннал УФСИН-лул спецназрал отдел «Орел» сакин хьуну 25 шин хьунни. Ва кьинилун хас дурсса шадлугърал мероприятиялий гьуртту хьунни Управлениялул ва УИС-рал идарарттал хъуними, Дагъусттаннал МВД-лул ОМОН-лул ва СОБР-лул каялувчитал, отделданул (ОСН) ветерантал, отделданул зузалтрал кулпатру.

— ХIурмат бусса хIаписартал, отделданул цинявппагу зузалт, службалул ветерантал! ДакIнийхтуну барча буллай ура зу 25 шинал юбилейращал. Вай 25-гу шинал лажиндарай отделданул зузалтрал ккаккан був­ссар цала хIал чIяру-чIярусса жаваблувсса давурттай. 1995 шинал хIакьинусса кьинилийн бияннин отделданул зузалт ччя-ччяни кIункIу буллай бивкIссар Ухссавнил Ккавкказуллал региондалий хъанахъисса иширттавун. Спецназрал зузалт гьуртту хьуссар Чачаннаву ва Дагъус­ттаннай къачагътурал кьюкьри бат дуллалисса операциярттаву. Гьар кIанайгу зу дакI марцIну биттур буллай бивкIссару зула къуллугърал бурж. ХIакьинусса кьинигу зу, къучагъшиву ва лавайсса даражалул пишакаршиву ккаккан дуллай, бартбигьлай буссару яла захIматми ва жаваб­лувми бигарду, — увкунни спецназрал зузалт байрандалущал барча буллай Дагъусттаннал УФСИН-лул хъунама, виваллил службалул генерал-майор Муслим Даххаевлул.
Хъирив ихтилат бунни спецназрал отделданул хъунама, виваллил службалул подполковник Аьбдулла Аьбдуллаевлул.
— УИС-рал спецназрал отделданул зузалтрай бивхьу­сса бигарду мукунсса бур, ши­кку зузими бикIан аьркинну бур цIуллу-цIакьсса, сивсусса, кьянкьа-кьурчIисса. ЧIявумур чIумал вайннан зун багьлай бур оьрмулул нигьачIаву ду­сса захIматсса тагьардануву, ляличIисса шартIирдай. Пишалул даража гьаз буллай, ххишаласса кIулшивуртту ласлай, гьарца кьини цала ялув зун багьлай бур жул зузалтран. ЦIу-цIусса масъалартту хьхьичI бихьлай, ми бартбигьлай, ялу-ялун ххуй­сса ккаккияртту чIалачIи дуллай, хьхьичIунмай хъанай, гьаз хъанан аьркинну бур жунма, – увкунни Аьбдулла Аьбдуллаевлул.
Спецназрал зузалт байрандалущал барча бунни УФСИН-лул Ветерантурал советрал председательтурал, УФСИН-лул профсоюзрал организациялул СОБР-лул ва 2-мур ОМОН-лул командиртурал. Гьашину байрандалуцIун дархIуну спецназрал зузалтран дуллунни личIи-личIисса наградартту – ХIурматрал грамотартту, барчаллагьрал чагъарду, бахшишру. Хъирив «Орел» ОСН-лул зузалтрал ккаккан бунни цала гьунарду.
Шадлугърал мероприятие къуртал хьунни спецназрал отделдануву зузиминнал оьрчIал, магьирлугърал зузалтрал, мукунна АьФ-лул искусствалул лайкь хьусса зузала Аь. Хамдуллаевлул каялувшиндаралусса «Асса» тIисса оьрчIал хореографиялул ансамбльданул хIадур дурсса концертрал программалийну.
ДР-лул УФСИН-лул пресс-служба
ХIадур бувссар
А. Аьбдуллаевал