Октябрьданул 4-нний «Дагестан» РИА-лий «Открытая власть» проектрал хахливу ДР-лийсса ВацIлул хозяйствалул къайгъурдалсса буллалисса комитетрал хъунаманал хъиривчу Велибек Ферзуллаевлущалсса пресс-конференция хьунни.

З. АьбдурахIманова
Шикку ванал бувсунни махъ ппурттуву республикалий ва аралуву дурсса давурттая, хьусса ккаккиярттая ва цIушиннардия.
БакIрайва ванал кIицI бувунни, сентябрьданул шамилчин­сса алхIат кьини щалла дунияллий кIицI лагайшиву ВацIлул зузалал кьини, гьашину 50 шин хъанахъишиву Дагъусттан Республикалий ВацIлул хозяйствалуха зузисса министерство сакин бувну. Агьамсса тарихрал иширан хасну комитетрал сипталий «Лотос» басмаханалий бивщуну бур «Леса Дагестана – прошлое, настоящее и будущее» тIисса, 500 тираж ду­сса лу. Луттирай республикалул циняр районнайсса вацIрая, микку­сса тIабиаьтрая ва вацIравусса мурхьирдал журардая, ххяххиярттая, жанавартрая чивчуну бусса бур.
— Республикалул вацIлул хозяйствалуву зузисса пишакартуран ца яла агьаммур масъала бур тахта-тIама дувайсса инфраструктура дакъашивруцIун бавхIусса масъала. Тахта-тIама дуллансса шартIру дакъани, бюхълай бакъар халкьуннан зунсса кIанттурдал щаллушиннагу дуван. Ва тагьарданува букканшиврул, тахта-тIаннуха зунсса цехру буван багьлай бур. Ца цехру тIитIаврийнугу ва масъала щаллу къахьунтIиссар. Гихуннай аьркин­ссар тахта-тIаннуха зузиминная ва ми ххилаххиминная багьай­сса тIалавшиннарду дусса законну кьамул дан. Билаятрай дуссар му аралул ялув дарцIусса, цинявннан аьм­сса паччахIлугърал информациялул система (ЕГАИС).
Вай бакъасса, мукунма жуйн багьайссар вацIри цIу дагьаврия буруччайсса, цIусса вацIри бугьлан аьркинсса, вацIри ишла буллалиминная дагьайсса арцу дукIлакIи дуван аьркинсса ва цаймигу масъалартту, – бувсунни В. Ферзуллаевлул.
Мукунма, ванал бусаврийну, гьашину яла цIу лачIун нигьачIисса ппурттуву республикалул вацIраву 15 цIу ларчIсса иш хьуну бур. ЦIу ларчIун, му лещан дуван захIмат хьуну бур кIива ишираву хъуншагьрулул зума-къирагърайсса вацIраву. Гьар шинах МахIачкъалаллал лесничествалун хъуннасса нигьачIишиву дикIайсса дур Ленинккантливсса ва Талгиливсса ччюрк дичай свалкардай ларчIсса цIарая. Аьмну республикалул вацIран нигьачIисса чIун дикIайсса дур инттухуннай, ччяни гъилишиву дагьну ва гъараллу чансса ппурттуву. Вай ишру чан баву мурадрай ВацIлул хозяйствалул МЧС-ращал, чIаххуврайсса регионнащал, муниципал районнал каялувчитуращал цачIу дурну дур чIярусса давуртту. Информациялул аралувугу халкьуннахь вацIри буруччин аьркиншиврия буслай къачансса даву дурну дур.
Велибек Ферзуллаевлул кIицI бувунни, шин дайдирхьуну ттинин цал зузалтрал 276 га аьрщарай бувгьушиву шинал мутталий бугьан ккаккан бувсса мурхьирдал 70,9 процент. ВацIри ххялтIа бувксса кIанттурдай бивкIсса мурхьирдан кIанай бугьан, вацIлул питомникирттаву вайннал ххяххан бувну бур жагьилсса ттарлил ва укунма­сса мурхьирдал 1,2 миллион. Вайксса мурхьру вайннал хозяйствар­ттан биял хьун тIий бусса бур гьашинугу бувгьуну, хъиривмур шиналгу бугьан.
Халкьуннал дянивсса ВацIрал кьинилул хьунийн щалва Аьрасатнаву дувайсса акциялул хахливу комитетралгу дувайсса дур «Яла ххуймур лесничество ва яла хьхьичIунма лесник» тIисса конкурс. Дувайсса дур мукунна «Лесниктал тIитIлай бур нузкьунтту», «Яхъанахъу, вацIай!», «Ххувшаврил вацIа», «ВацIа бугьай кьини» тIисса личIи-личIисса акциярдугу. Вай акциярду нани­ссаксса хIаллайгу республикалул шагьрурдал ва районнал паркирдаву, ххуллурдацI, идарарттал хIаятирттаву гьар шинах 15 азарваксса мурхь бугьайсса бур. Мукунма комитетрал къулагъасралу буссар вацIраву цумур-цагу мурхьирдал, ххяххиярттал азарду су­кку хьун къаритаврил, зиянчитал багьан къабитаврил масъаларттугу. Кьукьайсса бур чIун-чIумуй зия хъанахъисса хъунив хьусса мурхьру ва къатIри.
Халкьуннахьхьун ишла бан буллусса вацIри ххявхсса кIанттурдая гьар шинах республикалул бюджет­равун 2 миллиондалийн дирсса арцу дучIайсса дур. В. Ферзуллаевлул кIицI бувунни, бюджетравун вайннуяргу ххисса арцу дукIлакIи дан бюхъантIишиву цаща, агарда мукунсса аьрщирду ларсъсса халкьуннал цила чIумал арцурду дуллай, дяниву цIакь дурсса кьутIирду щаллу дуллай бивкIссания