Октябрьданул 4-нний Ма­хIачкъалалив тIив­тIунни А. Тахо-Годил цIанийсса Дагъусттаннал паччахIлугърал тарихрал ва архитектуралул цачIун був музей. Му тIитIлатIисса шадлугърай гьуртту хьунни ДР-лул БакIчи Рамазан АьбдуллатIиповгу.

Бадрижамал Аьлиева
Музей тIитIлатIисса шадлугъ дайдихьлай, Республикалул БакIчинал увкунни:
— Культура – му халкьуннал аьпа­ри. Му аьпа буручлачиминугу, хъунмурчIин, Аьрасатнал музейрдал идарарттур хъанахъисса. ЖучIара салкьи хьуну дур хъинну чIярусса музейрал экспонатру, цалгу чIалачIи буллалисса жулла культуралул, жулла аьдатирттал куртIсса тарихрал мархри. Амма, цуксса хIайпнугу, совет ва постсовет заманнай жучIава бакъая ххуйну щаллу бувсса музейрал къатта – дагъус­ттаннал музейный центр.
Хъуннасса агьамшиву дуссар ва музейравун увкIсса инсаннаща, так ца тарих ххал баву бакъагу, бюхъаву цинма музейран кьимат бищунгу.
ДР-лул ХIукуматрал Председательнал Цалчинма хъиривчу Анатолий Карибовлул, ДР-лул БакIчинал ва ХIукуматрал Администрациялул Каялувчинал хъиривчу Камил Ясуловлул, культуралул министр Зарема Буттаевал, строительтурал хьхьичI бивхьуну бия захIматсса масъала ва миннаща му щаллу буван бювхъунни.
ХIакьину жунна ци чIалай дур? Ца чулух бивхьуну бур хъунасса шаэр Расул ХIамзатовлул кулпат ПатIимат Сяидовнал сипталий бувсса искусствардал караматсса музей, вамур чулухгу – тикрал къашайсса атрибутикалущалсса ххаллилсса музей.
Музей зун аьркинссар. Шивун букIлан аьркинссар шагьрурдал ва районнал жагьилтал, дуклаки оьрчIру, мунияту чара бакъа сакин дуван аьркинссар музейрал хасъсса программа, — увкунни Р. АьбдуллатIиповлул.
Гихунмай мунал бувсунни ччя­сса мутталий музейраву тIи­тIин­тIишиву Дагъусттаннал славалул зал. КIицI лавгунни музейрал цIусса къатрал бушиву цила тарих – ми бивкIссар генерал-губернатор Барятинскийл къатрину, республикалул каялувшиндарал къатрину, яла миву бивкIссар республикалул Шяраваллил хозяйствалул министерство.
Музей буллай бивкIсса строительтурахь барчаллагьгу увкуну, миннан ва музейрал зузалтран Республикалул БакIчинал дуллунни паччахIлугърал наградартту.
Махъру мукунма лавхъунни РАН ДНЦ-рал президиумрал председательнал буржру чIумуйну биттур буллалисса Муртазааьли ХIажиевлул, ДР-лул культуралул министр Зарема Буттаевал. Мунил Республикалул БакIчинан буллунни музейравунсса цалчинсса билет.
ЯтIул лента кьувкьунни Рамазан АьбдуллатIиповлул, Хизри Шихсяидовлул ва Зарема Буттаевал. Муния махъ цинявнналагу ххал бунни музейрал къатри.
Музей бивхьуну бур 3 азаллий квадратный метралий, микку бур 19 зал, административный цIусса комплекс, хранилищардал фондру, творчествалул студия, музейрал «Дагестанский аул» коллекция ва м.ц..
Шиккува кIицI лаган, ва музей хъанахъиссар культуралул, ца Да­гъусттаннай бакъа, щалагу Ухссавнил Ккавкказуллал федерал округ­райсса ца яла хъунмамур идарану. Республикалул шагьрурдай ва шяраваллаву ванил бур 38 филиал.
Музей зузиссаксса хIаллай выставкарду дурну дур Великобританиянаву, Австриянаву, Японнаву, Болгъарнаву, мукунма Аьрасатнал Федерациялул шагьрурдай ва регионнай. Музейрал махъа нанисса ник тарбия давриву дуллай бур хъуннасса даву. Гьарца шинал ши­ккун музейный делолул практикалий бучIайссар республикалул лавайсса ва дянивсса дуккаврил идарарттал студентътал. Элмийсса зузалтрал дувайссар тематический экскурсиярду, буккайссар лекцияртту.
Цукссагу хIаллай музей бивхьуну бивкIссар МахIачкъала шагьрулул хъунмур майдандалий, къумасса шартIирдаву. Республикалул хъунмур музейрал тарихийсса ва культуралул агьамшиву дурчIлай, 2013 шинал апрель зуруй Дагъусттаннал БакIчи Рамазан АьбдуллатIиповлул сипталийну музейран буллуссар цIусса къатри – Данияловлул цIанийсса кIичIиравусса хьхьичIавасса особняк, шагьрулуву бувагу бусса цавай къатри ХIХ аьсрулул ахирданий классицизмалул зумуну бувсса.