Уттисса Аьрасатнал ва цакьнира диркIсса СССР-данул тарихирттаву дакъагу, щалвагу Европанал тарихраву, 9-мур майрал кьинилущал дарцIусса, Ххувшаврил байрандалущал дишинсса цамур кьини ттун душиву къакIулли. 2015-ку шинал дурусну 70 шин хъанай дур му Ххувшаву ларсун.
Жулва оьрмулуву му байрандалул хъинну хъунмасса кIану бугьлай буну тIий, Ккуллал райондалий уттива байбивхьунни ялунчIинсса байрандалийнсса хIадуршинна дуллай. Июльданул 16-нний Ккуллал райондалул бакIчи Сяид Сулаймановлул кабинетравун бавтIун бия байрандалийнсса хIадуршиннарал давурттив дуван буржлув бувсса къуллугъчитал. Шикку бия: Ккуллал райондалул Ветерантурал комитетрал бакIчи Загьидиев Аьбдул, Жагьилтурал комитетрал хъунама Чаринов МахIаммад, Физкультуралул ва спортрал комитетрал хъунама ХIажиев Арсен, Культуралул управлениялул бакIчи Ибрагьимова Марина, УСЗН-лул хъунаманал къуллугъ биттур буллалисса Гъазиев Жамбулат, финотделданул хъунама Амучиев Кьурбан, райондалул азарханалул хъунама хIакин Кьубиев Кьурбан, УО-лул хъунама АхIмадов Шамил, «ЧаннацIуку» кказитрал редактор Къянчиев АбрикI, Ккуллал райондалул администрациялул иширтталсса бувайсса пишакар ХIажиева Надежда.
БакIраяту Сяид ХIасниевичлул ялун нанисса байрандалул жулва оьрмулуву цукунсса кIану бугьлай буссаривгу бувсун, махъ буллуна Загьидиев Аьбдуллухьхьун. Ванал бувсуна Ххувшаврил кьинилийннин хIадур дуван багьлай бушиву, Хъун дяъвилий гьуртту хьусса ва хIакьинунин яхъанахъисса гьурттучитурал сияхI дакъагу, къинттуллух талай, къанаврттай бивкIсса инсантурал сияхI. Ганияр махъ хьусса локальный дяъвирдаву гьуртту хьуминналссагу сияхI дуван багьлай бушиву кIицI бувуна. Га Ххувшаврил кьини дучIаннин гьарца шяраву, ветерантал бакъагу, бугьарасса инсантал щябикIан, шашкардай, шахматирттай буккан шайсса беседкартту буван багьлай бушиврия бувсуна. Шяраваллава дяъвилийн лавгсса гьурттучитурал къатрай, ми къатри хIакьинунин яхьуну бухьурча, гайннал цIарду чирчусса ултти лачIун дуван буржлув буллай бушиву бувсуна Республикалул Ветерантурал советрал.
Бунни ялагу дувансса цайми давурттаясса ихтилатру. Масалдаран, ветерантурал къатри дакьин дуван, волонтертурал дувансса давурттал сияхI дуван, школалий дуклакисса оьрчIахь чара бакъа чичин дуван багьлай бушиву цала хъунбуттахъан, хъунбавахъан, гъанссаннан, чIаххувран, шяравачутуран хас дурсса сочиненияртту. Га кьини ва агьамсса байран хьунадакьин ци дуван дурив ххалдуллалисса батIаву цалчинсса хьуну диркIукун, циняв масъалартту чулийн буккан буван ца кьини къабюхълай тIий, райондалул бакIчинал тапшур бунни цуманаща ци дуван бюхъанссарив давурттал сияхI хIадур дуван 1-мур августрайннин, яла гания гихунмай ми давурттаха зуншиврул.
