Июльданул 23-нний «Дагестан» ГТРК-лий хьунни ДР-лул БакIчи Рамазан АьбдуллатIиповлул тIайланнасса эфир «ТIиртIусса власть» проектран хасну. Эфирданул тема дия «Дахханашивурттал заманнай агьалинал вихшала цIакь даву».

Эфирдануву Рамазан Аьбду­ллатIиповлул жавабру дуллунни республикалул инсантурал суаллахьхьун.
БакIрай Республикалул БакI­чинал кутIану бувсунни Дагъусттаннал маэшатрал хIакъираву.
«Укунсса хьунабакьавурттая жун кумаг шай гьарца дагъусттанлувнащал маслихIат ккаккан, жува тIайлану зий буссарив ягу ба­къассарив. ХIакьину жун кIул хьуну ччай бур жун цуми масъаларттах хъунмур къулагъас дулланссарив», — увкунни ганал.
Рамазан АьбдуллатIиповлул увкусса куццуй, экономика хьхьичIуннай нанаврил бущилух бурувгун, жува Аьрасатнаву хьхьичIунми кIанттурдай буру, экономикалул лагрулун хасну махъва-махъми кIанттурдай бунугу. Цанчирча ца шинал мутталий къашай­хха тIайла дацIан дан экономикалул лагру. Жува мукунма цалчинмур кIанайн бувкру промышленность хьхьичIуннай нанаврил бущи хIисавну. Жува Аьрасатнал Федерациялий 4-мур кIанайн бувккун буру налогру датIаврил бущилух бурувгун. ХьхьичIми шиннардий Дагъусттаннал му чулуха махъсса кIанттурду бугьлай бивкIссар. Мура чIумал жура ратIлай буру регионал продуктрал так 5% налогирттал, Аьрасатнаву 24% налогирттал ратIлатIисса чIумал, Ухссавнил Ккавкказнаву тIурча – регионал продуктрал 10%.
Дагъусттаннал БакIчинал бувсунни республикалул шагьрурдай низам дишаврил хIакъиравугу.
«МахIачкъала жучIава ккалли буллай бивкIссар Аьрасатнавусса яла ххуйми шагьрурдавасса цаннин, амма иширайну тIурча шикку яхъананвагу къабучIину бия. Уругала акъа ливчIун бия гостиницарду «Кавказ», «Дагестан», къаххуйсса тагьарданий бия Буйнакскийл кIичIира. Даву канилух дурксса каялувчи МахIаммад Сулайманов увкIун махъ хъуншагьрулий мадарасса дахханашивуртту хъанай дур», — увкунни ганал.
Рамазан АьбдуллатIиповлул бувсмунийн бувну, Дагъусттаннал 20 райондалул бакIчи аххана увну ур ца шинал ва цаппара зурдардил дянив.
Яла циняв бавтIминнан ккаккан дунни ДР-лул БакIчинал тапшур бавуртту биттур даврин хасъсса видеосюжет, хаснува яслирду, садикру, школарду, медициналул учрежденияртту баву.
Дагъусттаннал БакIчинал бувсунни, мукунма, вай гьантрай уттигу 3 оьрчIал садик тIитIлантIишиву МахIачкъалалив. Ганал мукунма бувсунни, агарда хьхьичIва шинал мутталий оьрчIал садикирттай ва яслирдай бувагу 600 кIану дузал байсса бивкIхьурча, ларгсса шинал дузал бувну бушиву 3400 оьрчIансса кIану.
Яла Дагъусттаннал БакIчинал жавабру дуллунни инсантурал суаллахьхьун. Муния бусанну хъиривмур номерданий.