ХIакьину гьарица инсаннал зума-ккарччулу Украина бур. Цинярдагу Аьрасатнал телеканаллал хаварду Украиннаву хъанахъимуния байбишай. Биту-ххиту, лекьа-пIякьурду, дяъвилул цIарава ливхъун нанисса мюрщи оьрчIащалсса хъами ва къари-къужри хIаласса лихъачалтрал кьюкьри. Аьрасатнал циняв шагьрурдай кьамул буллай бур кьини дурксса украиннал халкь. Оькьини дуркнал чIарав мудан бацIайсса, дакIру чумартсса дагъусттаннал халкьгу чулий къабавцIунни. МахIачкъалалия арх бакъа хьхьирил зуманив бивхьусса «Дельфин» тIисса бигьалагай зоналий биялсса лихъачалт кьамул бунни.

Андриана Аьбдуллаева
Ми ххуйсса аякьалулун лавсун бур республикалул къуллугъчитурал, цащава шайсса кумаг буллай бур агьалигу. Ларгсса нюжмардий цала чулуха ва цайминнал бувсса кумаграцIух лихъачалтран диялсса дука-хIачIанмур, лаххи-ликкия, ичIура аьркин данмур ларсун зоналийн лавгунни МахIачкъалаллал Кировский администрациялул бакIчи Сагидов СалихI Камалович цалва зузалтращал. ИникIмалул, ппиринжрал, качаруннил дарвагру, сокру, мюрщи оьрчIансса нахIу-нацIу, мюрщинангу, хъунанангу янна-ус, хялатру, шюшу-лакьу данмур – дакъассарагу дакъая. Ми дакъассагу, гьарица кулпатран бакI хIисав бувну арцу дирхьусса конвертру буллуна. Жу бувкIсса чIумал лихъачалт кув ахттайнссаннуйн най бия, кув ахттайнссаннуя хьхьирийн най бия.
ЦIанасса чIумал шикку бия 108-110 лихъачалт, миннаву 42 мюрщисса оьрчI, микссава хъами, сайки 20 адамина ур тIий буслай бия. Ми хъунмурчIин Луганскаллал областьраясса бур тIий бия. ХьхьичI кьинигу, Кировский администрациялул сипталий, лихъачалтрачIан бувцуну лавгун бия №7 поликлиникалул ва №5 оьрчIал поликлиникалул пишакартал – педиатр, хирург, невропатолог, дерматолог.
Лякьлуву оьрчI бусса жагьилсса хъамитайпа ххал бувну бия циняв специалистурал. Администрациялул зузалтрал лавсун бувкIсса ссайгъатирттаву Маринан ва цаппара хIаллава дунияллийн уккансса чIивитIунссагу ссайгъат­ру чIявуя.
Хъирив кьини лихъачалт Дарбантлив экскурсиялий бувцуну лавгунни. Транспортрал масъалагу Билал Камаловичлул цала арцух щаллу бунни.
— Дарбантуллал къалалия чIяв­усса бавссия тIий, рязину бия экскурсиялийн лавгми.
Вай цала къатта-къуш, думур дуний кьариртун лихъансса бувксса, захIматсса тагьарданувусса Украиннавасса лихъачалтрал чIарав бавцIусса, кумаграл ка тIиртIусса инсантурал ва идарарттал цIарду кIицI къадурну къабучIир: АЗС-Астрахань – Газпром — М.З. Баширов, АЗС «Люкс Ойл» — М.А. МахIаммадов, Загородный поселокрайсса ятту-гъаттарал базар, АЗС «Экспо-Ю» — Г. Хиясов, Торговый дом «Магриб» — М. Хачилаев, АЗС «С-Газ» — М. Чураев, Ресторан «Чали» — М. Кичев, Ресторан «Калипсо» — АхIмад ва Сагид. Вай инсантурал, сайки цинявннал ацI-ацIазарда къурушрал кумаг бунни, 17 азаллихъая лирчусса арцунсса дуки-хIачIия дуллунни «Караван» ттучандалул – ппу ва арс АхIмадовхъал.
Жулва администрациялул зузалтралгу 100 азарда къуруш датIарду. Вай датIлатIисса ппур­ттуву шиккун тIайла бавцIусса ярудуш Сиядат Аьлиевал ва ШавкIратусса ттунма гъансса хъамитайпалулгу аза-азарда къуруш дуллунни, цадакьа хьуннав, чирилун дацIаннав, — тIий буслай бур Кировский администрациялул управделами ПатIимат Зайдиева.
— Вай уттигу кIанттул хьун бувар. Цуксса ххуйну бухьурчагу, ци шартIру духьурчагу, гьай-гьай, гьарица инсаннан шардалличIан дирсса цичIар къадикIайссар. Вайгу цала къатта-къуш дакIний, тийхва ливчIсса гъан-маччаминная буруккинттарай бур. На махIаттал унна жула халкьуннал чумартшиврул, дугъришиврул, — тIий ур Халкьуннал Мажлисрал депутат Оь.-ХI. Аьлиев.
Татьяна, лихъачу:
— Ттун 3 хъунисса оьрчI кьабивтун гьан багьунни. АрхIал буккансса сант къархьуна жул. ОьрчIру Мариуполлай буссия. Ми тиха бувксса чIумал таможнялий блокпост биту-ххиту бувну лявкъуну бур. Украиннава буккан, Ростоврайн бунугу биянсса чаран къаляхълай азурда хьуну бур. Суткалий муххал ххуллул вокзалданий бивкIун бур буккан къахъанай. Хъунмасса барчаллагь Аьрасатнал халкьуннан. Миннал уква Ростов-на-Дону шагьрулийн биян бувну бур. Утти тиха шихун бучIан аьркинссар. Ялугьлай бура.
Светлана:
— На Луганскалия бура. Да­гъусттаннайн хьхьичIра-хьхьичIсса кьюкьлувух бувкIми жу сайки циняв Луганскаллал областьраясса буру. Так ца адамина ия Славянск шагьрулиясса. Ялун яла Донецкаллал областьраяссагу бивунни. Жу ттигу ххуйну кIул хьун бувару. Часса бухьурчагу, жул цинявннал ялун бивсса бала ца бур, жул къумашиву аьмсса дур. На Да­гъусттаннайн хъунама ва чIивима оьрчIащал бувкIра. Дянивма цалва кулпатращал Къиримнавур усса. Заннайн щукру, оьрчIал буруккинвагу бакъар. Гьай-гьай, Украиннаву ттул гъан-маччасса буссар. Тайннай дакI цIий дур. Мунияту шийх жунна ци дялахърурду дулларчагу, дакI ххарину дакъар, виримукьал буцIлай бура. Кьаритан багьсса ттулла къатрай аьтIий бура. Бакъассия Украиннаву ттул хъуни чIалъаьрду. Буссия ттула захIматрай, ттула карунних бувсса хъунма бакъасса къатта. Гьарзатраву ттулла дакI дирхьусса, ттула ужагъ, тIюва. ДакI цIунцIу тIий дур. Ци дуссар миналия лихъавунияр захIматсса. Жипливу карщуйн бияннин, гьарзатрай хIайп тIий бура. Ци банссар, Заннал чичру укунсса духьунссия.
Елена Чумакова, лихъачу:
— Жу бувцунну хьхьичIа­за­маннул шагьрулийн Дарбантлив экскурсиялий. ДакIру къумасса жун ва экскурсия цила чIумал дурсса, жулва буруккинтрая ххи­хху битансса даву хьунни. Гъирарай ххал буварду дунияллийх цIа дурксса Нарын-къала, Каспий хьхьирил зуманив бияннин нанисса цIанихсса къалалул чIиртту, кIул хьуру хьхьичIазаманнул шагьрулул тарихращал, кIанттул агьалинащал. Жу ва экскурсиялия хъунмасса хIаз ласарду. Телевизорданувух ххалхьумур, утти жулва яруннин ккарккунни.
Ольга Просандеева, лихъачу:
— Дарбант шагьрулул караматру ххал дурсса цинявппагу лихъачалтрал цIания барчаллагь тIий бура жунна ва дялахъру дур­сса МахIачкъалаллал Кировский администрациялул бакIчи СалихI Сагидовлухь, барчаллагь тIий бура Дагъусттан Республикалул каялувчитурахь, захIматсса тагьардануву ливчIсса жулва халкьуннан кумаг буллалисса, чIарав бацIлацIисса.
СалихI Сагидов, МахIачкъала шагьрулул Кировский администрациялул бакIчи:
— Дагъусттаннайн бувкIун махъ, цивппа бавцIусса кIанттурдая чунчIав къабувксса лихъачалт цахъи бялахъан баву мурадрай, Дарбантлив экскурсия бан дакI­нийн багьунни. 96 лихъачу, миннавух 36 оьрчI, бувцуну лавгру Дарбантлив. На барчаллагьрай ура ва давриву жула чIарав авцIусса Дарбантуллал райондалул бакIчи Кьурбан Кьурбановлуйн. Экскурсия къуртал хьуну махъ хъамаллуран Дарбантуллал райондалул администрациялул къат­раву тIивтIунни Дарбантуллал кухнялул тIин-тIааьн ххал бансса авадансса ссупра. Экскурсиялул хIакъиравусса жул пикри ххуй чулий ккавккунни МахIачкъала шагьрулул бакIчинал кIанайсса МахIаммад Сулаймановлулгу. Шагьрулул администрациялул хъуннасса къулагъас дуллай бур Украиннавасса лихъачалтрах. Утти­ния тихунмайгу жущава шайсса кумаг буллантIиссару вай инсантуран. ХIарачат банну ми давурттал дузал бан, оьрчIру школардайн, садикирттайн бакьин.