Ларгсса нюжмардий МахIачкъалалив «Дусшиврул къатлуву» («Дом дружбы») бивхьусса Аьрасатнал культуралул фондрал Дагъусттанналмур филиалдануву хьунни ДНЦ РАН-рал ХI. ЦIадассал цIанийсса ИЯЛИ-лул элмулул хьхьичIунсса зузала, искусствоведениялул кандидат, АьФ-лул искусствалул лайкь хьусса ишккакку, АьФ-лул Театрданул ишккаккултрал союзрал член Султанова Гулизар АхIмадовнал цIусса луттирал презентация. «Дагестанская театральная режиссура» тIисса ва ххуллухмур лу хъанай бур авторнал ацIния ххюлчинсса луну, дагъусттаннал театрдая, искусствалия чивчусса луттирдал сияхIраву.
Бадрижамал Аьлиева
Ва батIаву дачин дурну ия Театрданул деятельтурал союзрал Дагъусттанналмур отделениялул председатель Айгум Айгумов.
Махъру лавхъунни Аьрасатнал культуралул фондрал Дагъусттанналмур отделениялул каялувчи Луиза Гавриловал, республикалий цIа ларгсса режиссертал Ислам Казиевлул, Скандарбек Тулпаровлул, Аслан МахIаммадовлул, А. Къапиевлул цIанийсса Лакрал музыкалул ва драмалул театрданул художествалул каялувчи Бадрижат МахIаммадхIажиевал, Дагъусттаннал паччахIлугърал Ссихьрал театрданул директор Аминат ЯхIияевал, ДР-лул культуралул министрнал хъиривчу Елена Гьаруновал, ДР-лул Жяматийсса Палаталул бакIчинал хъиривчу Ссапар Аьбдуллаевлул, ДР-лул культуралул министрнал хъиривчу Мурад ХIажиевлул, мукунма чIявусса цайминналгу.
Махъру лахълахъими чIурчIав дуллай бия Гулизар АхIмадовнал критик хIисаврай дайсса аьйгу, замечаниягу тIайласса, багьайсса дикIайшиврий, мунин дагъусттаннал театрду ххишала бакъа куртIну кIулшиврий, ванил луттирду ми багьа бищун къашайсса хъусну бушиву жулла республикалун, хаснува ДГУ-рал культуралул факультетрал актертал хIадур байсса отделениялул преподавательтуран ва студентътуран, ва кунмасса инсанталгу республикалул пахру бушиву. Аминат ЯхIияевал цилвамур ихтилатраву кIицI лавгунни ваксса хъунмасса захIмат бувну, укун мина-гьану бивзсса давурттив даншиврул, вакссава укунсса захIмат баншиврул инсаннан цалва пиша, театр цукссава ххирану бикIан аьркинссарив, шану бакъасса хьхьурду дичланшиврул инсан цукссава эшкьи хьуну икIан аьркинссарив цалва пишалух. Гулизар АхIмадовна цуппарив лащан бунни инсантуран чани ва гъилишиву дуллай бивтсса бургъиха.
Аслан Садикьовичлул барчаллагь увкунни Гулизар АхIмадовнахь я артистал, я режиссертал, я театрдал махъсса зузалт хьхьарану зун къабитлай, ми цалнияр цал хьхьичIунмай, лавай хъанай най бушаврихлу, ванищал архIал ца магъул лув зун бюхъавугу цалва бахттилун ккалли бунни.
Бадрижат Набиевнал цилва ихтилатраву чIурчIав дунни Гулизар АхIмадовна лавайсса даражалул критик бушиврий, цилгу ларайсса кIулшиву ларсъсса Ленинградуллал академиялуву, ванил луттирдугу дагъусттаннал культуралул мусил фонд бушиврий.
«Дагестанская театральная режиссура» луттиравун цилла цIагу дутаврихлу авторнахь барчаллагь увкунни республикалул жагьилсса режиссертуравасса ца режиссер Диана Бижитуевал.
Ссапар Аьлиевичлул тIурча дакIнийн дирчунни 60-кусса шинну, ПартIу-ПатIимал роль дургьуну Гъази-Гъумук сахIналий цанма Гулизар АхIмадовна ккавксса чIунну.
Мурад ХIажиевлул автор лащан бунни кару магьирсса агрономнаха, мурхьру мархлуцIакул кьукъакьлайна, аякьалийну тиха-шиха бакьи-шакьин буллай, миннул диц-куц ххуй дуллалисса. КIицI лавгунни ванил «профессионалнайсса критика» цанна оьрмулул школану хьушиву, 20-мур ттуршуку, му плогиатрал ттуршуку душиву, амма Гулизар АхIмадовнарив щихакIуй лакъахьлай, щилчIав дурмуних къабуруглай, цинма ххуллу цила лавсун най бушиву, луттирал ца чIапIи чичиншиврул, бакIраву ацIра чIапIуйн гьануксса информация, пикри-зикрирду бикIан аьркиншиву, муна мукунсса бакI бусса лавайсса даражалул пишакар бушиву ва.
Ва презентациялий дакIнийн бивчунни аьпалул хьусса режиссертал, гьаз бунни хIакьинусса кьинигу щаллу къавхьусса цIурувкьюсса масъалартту.
