Шиная шинайн хъуннасса къулагъас дуллай бур Лакрал райондалий дуклаки оьрчIру ва жагьилтал спортрахун машхул баврил чулухуннай.
Ччя-ччяни шай, хъун хъанахъисса ник цIуллу-цIакьну тарбия даву мурадрай, ми оьмуния, оьккимуния буруччаву мурадрайсса жура-журасса спортрал турнирду, бяст-ччаллу, тIуркIурду. Миннува цаппарасса аьдатравун багьну бур. Гьарца шинал шайссар «Лакрал район» МР-данул бакIчинал завалунсса футболданул турнир, райондалул КIулшиву дулаврил управлениялул кубокрансса футболданул турнир, Ххувшаврил кьинилун хас бувсса спортрал личIи-личIисса тIуркIурдал бяст-ччал, «Президентские состязания» тIисса щалвагу Аьрасатнал дуклаки оьрчIал дянивсса спартакиада.
Райондалул спорткомитетрал ва КIулшиву дулаврил управлениялул сакиншиннарайну бигьалагай кьини Гъумук ларайсса сакиншиннарай хьунни ирглийсса спартакиада. ЦIунцIия хьунан кумаг бан къаралданий бия«Анаварсса кумаграл» машина, бяст-ччаллил низам зия къадан къаралданий — полицанал зузалт.
Бяст-ччалливу гьуртту хьунни 14 школалул дуклаки оьрчIру, сайки 280-нния ливчусса дуклаки оьрчIру.
Бяст-ччаллил программалувун бухлай бия: ка дишаву, 16 кг. кIушиву дусса пут личаву; 1500 метралийх лечаву, 100 х 4 эстафета, лахъишиврий тIанкI учаву, чару личаву ва цаймигу (душарал ва оьрчIал дянив).
Бяст-ччаллил хIасиллу дунни 5-9-ми классирттаву дуклакиминнал дянив ва 10-11-ми классирттаву дуклакиминнал дянив личIи-личIину.
10 -11-ми классирттал дянив цалчинмур кIану бувгьунни Гъумучиял школалул командалул, кIилчинмур кIану – Ккурккуллал школалул командалул ва шамилчинмур кIану – Гъумучиял лицейрал командалул.
5-9-ми классирттал дянив цалчинмур кIану бувгьунни Хъурхърал школалул командалул, кIилчинмур кIану – Гъумучиял школалул командалул, шамилчинмур кIану – ГьунчIукьатIрал школалул командалул.
Цинявппагу гьуртту хьуминнан райондалул КIулшиву дулаврил управлениялул буллунни дипломру, хьхьичIунсса кIанттурду бувгьусса командарттан тIурча дуллунни спорткомитетрал чулухасса бахшишру.
Лажин хIадур дурссар
Зулайхат Тахакьаевал
