Март зурул 20-нний гьашину дурусну 70 шин хъанай дур Лакрал ва Ккуллал районная 30 шяравалу, кув мархлуцIакул, щаллунна, кувгу ца-ца ххарахIала, мичиххичнавун дизан дурну. Бизан бувминнавух Лакрал райондалия дур вай щархъурду: Бурттун, Бухцанахъи, Варайми, ГьаркIасси, ДучIими, КIихIарчIи, Ккурхъи, Маркьи, НицIавкIул, Суннарали, ТтурчIи, Ххалакки, Чаравалли, ЧIаящи, ЧIурттащи, Шушими ва Аьхъар. Ккуллал райондалия дур: Ваччи, ЧIяйми, Гьамиящи, Бярнихи, Ккул, Къичурлухи, Ккацран, Хъювхъи, ЦIущар, Чакъал, Ххяллухи, ЦIувкIул, Хъусрал ЧIар.
Вай цинярдагу лакрал щархъурдаясса халкь бизан бувну бивкIссар март зуруй 1944 шинал, гужрай цала-цала буттахъал минарду кьаритан бувну, къача-къучшивуртту сававну Дянивмур Азиянавун бизан бувну бивкIсса мичиххичнал аьрщарайн. Вай бизан буллалисса зунттал халкьуннан арнил гьава къабакьайшиву кIулну бивкIссар, цанма-цивппа бакъа къаххирасса танийсса чиновниктуран, укунмагу ккашикалсса инсантал чара бакъа бургъил цIуцIаврил, чIиникIрал уртту кунма, кьатI булланшивугу кIулну бивкIссар миннан, цума-цагу миски-гъаривнал ужагърайгума цанма лавхьхьусса буза бикIайшиву, ми цащала ласун аьркиншиву, кьабитлатисса къатта-къушлищал цалла думургу кьаритан багьлай бушивугу кIулну бивкIссар миннан. «Жун цичIав къакIулли, ина бизан аьркинминнал сияхIравун агьссара, ачу!». СияхIругу дурну диркIун дур анавархъиндарай. Мивун бухлайгу бивкIун бур шяраву яла миски-гъаривми, чIарах ацIансса чув акъами, чиновниктуран цанма къаххирами, учин мукъун, цавай байчаратал, бургъил цIуцIаврил бичин хIадурми.
Мунияр ххишалагу лакралми къуллугъчитураща учин бювхъуну бакъар: «Да, гьалмахтал! Лакрал миллат хIиллакартал бакъар, ми къачагъталну лавгун бакъассар, миннан хаиншиву цирив къакIулссар, тай шиннардий уссавагу 52 азара лакрал инсаннава 19% ва ххишалагу фронтирттай талайри бусса, захIматрал аьралуннаву Дагъусттаннайсса халкь хIисаврай, яла чIявуми окопру дуклайри бусса, фронтран кумагран датIлатIисса арцу-муси ялагу чIяруну дартIмигу мири, жу ми жула чан-кьансса халкь жува цукуннугу щаллу баннуча, битияра», — учин. Укун ци учиви, халкьру цала минардая бизлазини ми биян бансса транспорт дикIан аьркиннихха. Хъинни, хъуннасса Ккуллал щарнища бювхъуну бур бизан буллалисса 120 ужагъран 59 аьрава щаллу дуван, кIива я бусса зунттал аьравалттийн лагаймур цир? Мугу ца-ца ужагъран ца-ца аьрава духьурчагума, уртту хьун дурасса чIумал, аьравалттий бишин аьркинни ххуллийх ницан бичинсса ххулув, щяикIан аьркинни аьравачи, личIлай бур ца чIапаксса кIану, миккугу дишин аьркинни лув-ялун рутансса, чан-кьансса бунугу ххуллийх ишла бансса мурцIукъатта, ххуллийх кулпатрал дуканмур. Яла ци кIанур аьравалттий личIлачIисса? Мугу, учавхха, ца-ца ужагъран ца-ца аьрава духьурча, ца-ца аьрава диркIссар бувагу ххюва, буттахъул аьрай буминнал хIурматран, махъминнан 2-3 къатлун ца аьрава хIисаврай. Укун, мюрщи оьрчIругу мукьах бивщуну, бахьтта 185 км. Щурагьун бияннин найру жу бувкIсса. ЛитIлатIавуртту тIурча ххуллийхрар жул дайдирхьусса. «Жух бурувгун, зу, ккул, лап къудурну бивкIун буру», — учайссия аьпа бувсса ттула дус Нахахъал Нариманнул, Хъювхъатусса. Вайннахь диркIун дур дурагу 3 аьрава 30 ужагъран, миннуйгу кIира аьравалттуй къашайсса адамина ва щарсса, мигу ххуллийхва ливтIуну бувччуну бур. Махъми ужагъирттахьгу бивкIун бур шярава бавтIсса ттукри. Жухь жухьва буссия тIар аьлимчу МахIачхъал хIукIу бавайсса ттукку, мугу Дурангъиял зунтту лахълай буна хIукIу бувну, банмур бакъа ливчIун бивкIссар. Пайда бакъая, хIукIугу буний кьабивтун, бавчуссару тIий буслан икIайссия Нариман. Вай гьарзад мюрш ивкIун бусласиссагу муниятура, кIай жулами бизан буллалисса миски-гъаривтал, ссайри тIайла буккантIисса учин лакраща къабювхъуну бивкIун бур. Укун ххуллийхра чIярусса захIматшивурттугу дурхIуну, бивссар мичиххичнавун. ЗахIматшивуртту тIурча цIусса миналийри хьунадакьланнагу диркIсса. Оьккиминнувугу оькки бала бия ккаши. ТIайлассар, най дунура ца-ца ужагъран ттурш-ттуршра кило хIажлуллачIал ссулкърал дуллуна, мунийну щаллу шаймургу ция. Гьарзадрахун дахчилачимур, пасат, ккаши бия. Баххана хьусса гьава, ккаши, байбивхьуна халкь кьатIа тIий, бургъил цIуцIаврил хьуннав, лякьлул цIаллил хьуннав. ХIат-хIисав дакъа мюрщи-хъуни литIлай байбивхьунни, кьинилун 3-4-гу литIайва, ливтIуми бучлан ка хъирив лаллай дакъая, даруртту, хIакинтал тIурча бувагу бакъая.
Укунсса даражалий халкь бухьурчагу, ЦIуссаккул тIисса жул шяраву кIира колхоз хIасул дурна, ца – цанналу Ккуллан, цагу – гара шяраву ялапар хъанахъисса ЧIяйннан, Ваччиян, ЦIувкIуллан, ЦIущуллан, Хъювхъиян. Ца шинава ва шяравусса кIира колхоз цачIун дурну ца колхоз дурна, колхозран Лениннул цIагу дуллуна.
ХьхьичIбутIуй колхозру духьурчагу микку щурущи данмур лапра чансса дия, бикIанмагу бия 10-15 чут ницал, 4-5-ра муххал кутан, 4-5-ра аьрава. ТIайлассар, дугьай хъуругу лапра чаннуя дусса, духьунссия 100-150 гектар. Колхоз ца дурну махъ ишру ялу-ялун къулай хъанай бавчуссар, кулунгирттал, чIатIрал кумаграйну бугьайсса къурду гьарза хъанан бивкIссар, колхоз заллусса техника ласлан бивкIссар, халкьуннал маэшат цалнияр-цал лавай хъанан бивкIссар. Колхозниктурал маэшат хъиннува лавай хьуссар Шагьабуттин колхозрал хъунаману усса шиннардий. Вай шиннардийри Лениннул колхозгу гужлан хьусса, Дагъусттаннал хIурматрал улттуйн лархъсса, муния махъ колхозру литIуннин миччагу къалирксса. Барачатсса ухьунссия, Шагьабуттиннул заманнай колхозниктурал сурду ятIул лачIал бувцIуну бивкIссар, гьарца колхозникнал къатлуву ттизайсса оьл хьуну бивкIссар, хIачIлан дяркъусса щин дурссар, колхоз заллусса 30 хъус духхай машина, 18 жура-журасса маркардал тракторду ларсъссар, 7 комбайна бивкIссар, ми дакъагу чIярусса колхозрал давуртту дувайсса жура-журасса техника ларсъссар.
ХIасилгу, халкьуннал лякьри дурччукун, цIуцIавурттугу духларгссар, гьарица чулухагу халкьуннал ахIвал хъинну лавай хьуссар, цIу-цIусса къатри дуллан бивкIссар, лаххи-ликкия ххуйчулиннай даххана хьуссар, приемникру, телевизорду ласлан бивкIссар, ттукран кIанай мотоцикру хьуссар, ичIува аьркин буллан куклу машинартту ласлан бивкIссар, ялун нанисса ник дуккаврихун дагьссар, клубру, библиотекарду, цIусса школа, складру, ттучанну, гьарзадгу щаллу хьуссар.
Утти бучIир жунма ялапар хъанан тIисса чIумал, гьарзад ухчIинларай кIура даллали дунни, хIукуматрал хъинну хайр буллалисса колхозру парча-тика дурну, дирияйнал дирияймур дацлай, дакъа-къатIа дунни. Ми гьарзад гьич, Ельциннул хIукуматрал III съездрал хIукму бунни, валлагь, му мичиххичнал аьрщирча, зун уттигу зулла мина даххана дан багьлай бур тIисса. Уттинин, 70 шинал мутталий, оьттул гьухъру дуккавай бувсса захIматру кьабитан буллайри бусса мичиххичнан гьарца чулухасса рахIатшивуртту дуваншиврул. ЦIуссалак паракьатну битаншиврул, мичиххичнан дуллуссар Хасавюртуллал райондалия ххаллилсса аьрщигу, микку къатри дансса арцугу. Миннахь учин аьркинссия: «Ччай урав вилла буттал аьрщарай ялапар хъанан? Ма, ачу шиккун, му винма къаччимур кIану була жун».[pullquote]Мунияр ххишалагу лакралми къуллугъчитураща учин бювхъуну бакъар: «Да, гьалмахтал! Лакрал миллат хIиллакартал бакъар, ми къачагъталну лавгун бакъассар, миннан хаиншиву цирив къакIулссар, тай шиннардий уссавагу 52 азара лакрал инсаннава 19% ва ххишалагу фронтирттай талайри бусса, захIматрал аьралуннаву Дагъусттаннайсса халкь хIисаврай, яла чIявуми окопру дуклайри бусса, фронтран кумагран датIлатIисса арцу-муси ялагу чIяруну дартIмигу мири, жу ми жула чан-кьансса халкь жува цукуннугу щаллу баннуча, битияра», — учин.[/pullquote] Мукун тIинахь, жу шиккугу ччай буру, миккугу ччай буру куну, жавабру дуллуну дур миннал.
Буллунни ЦIуссалакран Къумтуркъалаллал райондалийсса ца къакъулайсса кIану, кьуниясса шиннур гикку къатри дуллай дан къабюхълай. Гиккугу, цимиллагу, къумукьнащал къалмакъаллу хъанайннари дусса, му жул аьрщир, букьира мичча тIий. Ва куццуй пикрирдавун бивчунур бусса ЦIуссалакрал захIматкаш.
Ванияр тихунмаймур ЦIуссалакрал тарих цукун хьхьичIунмай бачинссарив къакIулли. ХIакьинусса кьини тIурчан гай бакIрачIан кьини дурккун бур, чIарав ацIан дакI-лякьа цIуцIима акъа ливчIун бур. ХIайп, ххуйсса халкь, хIайп, ххаллилсса захIматчитал, хIайп, оьнийн лавгсса халкьуннал оьрму.
Вай ларгсса 70 шинай ЦIуссалаккуй ялапар хъанайгу бивкIсса, зийгу бивкIсса жямат лайкьссар цумур-цагу пахрулун.
Дундар ХIажиев,
тарихчи
