Вай гьантрай ДР-лул БакIчинал ва ХIукуматрал Администрациялул Каялувчи Р. М. Аьлиевлул цIанийн бувкIунни АьФ-лул Чил билаятирттал иширттал министерствалул МахIачкъалаливсса вакилханалиятусса чагъар. Чагъарданий бувсун бур Дагъусттаннал профессионал боксер М. Аьбдуссаламовлун боксрай уклай унува цIунцIия хьуну махъ, цIанасса тагьарданул хIакъираву.
Нью-Йоркливсса Аьрасатнал Генконсульствалул информациялийн бувну, 2013 шинал МахIаммад Аьбдуссаламовлуй операция бувну бивкIссар Нью-Йоркуллал Рузвельтлул цIанийсса медициналул центрданий. Ганал бакIрал няравату тавтсса оь марцI бувну бивкIссар. Яла га тамансса хIаллай ивкIссар искусственный комалул тагьардануву. ЦIанасса ппурттуву М. Аьбдуссаламов хъин хъанай ур Нью-Йорклия 65 километралул манзилданийсса «Хелен Хэйс» тIисса реабилитациялул центрданий. Ганах ххуйну буруглай бур, аякьа щаллу дурну дур, ганал чIарав цалва кулпат Баканай бур.
Операция бувну махъ боксернал киямур я ххуйну тIитIлай бакъар, нярал къатраву салкьи хъанай дур хьюмушиву, гай марцI дан багьлай бур бурхIал ттурчIавухчил. Ганан асар хъанай бур цащалва гъалгъа буллалишиву, амма хIакинтурал пикрилий, ганаща ххишала я занан, я гъалгъа тIун къахьун тIий бур. ЦIунцIия хьуну махъ М. Аьбдуссаламовлул чурх 40 килорал куклу хьуну бур.
Баканай Аьбдуссаламовал мукъурттийн бувну, МахIаммад хъин аврихлусса харж буккан бан бакIрайн лавсун бур Аьрасатнал Профессионал боксрал федерациялул президент А. Рябинскийл. М. Аьбдуссаламовлул гъан-маччанал махъсса ппурттуву Генконсульствалухь цукунчIавсса тавакъюрду бувну бакъар.
МИД-рал МахIачкъалаллал вакилханалул каялувчи
Б. Аьлиев
