Апрельданул 8-нний МахIачкъалалив Р. ХIамзатовлул цIа­нийсса Миллатрал библиотекалуву хьунни гьунар бусса художник Башир Увайсовлул давурттал выставка, «Луч чудесного огня» цIанилусса.
«И путь мой озарять он станет лучом чудесного огня…» тIисса Михаил Лермонтовлул ххаругу творчествалул бувцIусса Баширдул оьрмулуцIун щаллуну бакьлай бур.

Бадрижамал Аьлиева
Ва выставкалул сакиншинначиталну хьунни ДР-лул Культуралул министерство, Республикалул Халкьуннал творчествалул къатта. Выставка хьунни РДНТ-лул «Самородки» проектрал лагрулуву.
Ва выставкалул чIярусса цайминнуясса личIишивугу дия ваний автор цува акъашиву, цIуллу-сагъшиврул тагьар сававну. Амма ванал гъан-маччанал, дустурал, даврил уртакьтурал лахълахъисса гъилисса, хъин-хъинсса мукъур­ттийну, миннал бусласисса хавардайну Баширгу миннавух усса кунмасса асар хъанай бия.
Махъру лавхъунни ДР-лул культуралул министрнал хъиривчу Марита МухIадовал, искусствоведениялул кандидат, РДНТ-лул декоративно-прикладной искусствалул специалист Мариян МахIаммадова-Чалабовал, профессор ХIусман ХIусмановлул, художник-иллюстратор Ажу Къячаевлул, филологиялул элмурдал доктор, профессор Сулайман АхIмадовлул, Расул ХIамзатовлул фондрал вакил ХIабибат Аьзизовал, ДР-лул лайкь хьусса артистка Зумруд Селимгереевал ва цайминналгу.
Ихтилатру буллалими циняв­ппагу чIурчIав дуллай бия Башир искусствалул цимивагу ххуллий зун бюхъайсса гьунарданул заллу ушиврий, мунищала дакI тIиртIусса, хъинсса, пахру-ххара бакъасса, «на» тIий, «ва на дурссар, та на дурссар» тIий леххаву къатIутIисса, цумусса, хьхьичIун урувгсса инсан ушиврий, дяркъусса, кьянкьасса муххая ванаща, авурсса накьичругу дусса, я батIин къашайсса муххал къапурду, чапарду, цаму-цамургу дуван бюхъайшиврий, Дагъусттаннайсса «Кьурукьирттал» цалчинсса гьайкалданул авторгу ва ушиврий. Цинявппагу чIа тIий бия Башир Давдиевичлун ччясса чIумул му­тталий къашавайсса шания изаву, вания тихуннайгу цайми-цайми ххаллилсса давурттив дуллай, инсантал ххари буллансса чIярусса, цIуллусса шинну.
Мяйжаннугу, Баширдул канила дурккун дур цикссагу ххаллилсса давурттив. Жува гьарца кьини занай буру жулла республикалул хъуншагьрулул кIичIирттавух, амма чIявумур чIумал бакIравун пикривагу къабуххай гьарца кьини жулла итталун дагьлагьисса затирттал автор цу урвав, вай щил дурнавав тIисса. Мукун, Башир Увайсовлул дурну дур Лениннул цIанийсса кIичIиравусса, мунил чIалачIин хъин чулиннай даххана дуллай, шагьрулул диц-куц дучIан дуллалисса, авурсса фонарьдал тталлу, мукунма шагьрулул хъун майдандалиймигу, МахIачкъалалийсса «Кьурукьругу», Миллатрал библиотекалучIасса хъамитайпалул «Элегия» скульптурагу, «Слава труду» композициягу, къапурду, балконну ва чIяру-чIярусса цайми давурттивгу. Башир Увайсовлул каруннил дурсса авурсса, муххал хъунира-хъунисса давурттив хIатта Мурманскаллал областьрайгума дусса дия. Ванал канила дурккун дур «Анжи» футболданул командалул лишангу, цувгу щалла дунияллийхгу дурксса, Каспийскаллал чIарав «Анжи-Арена» стадиондалувун бувххун нанисса кIанайсса хъуннасса щит. Ванал дур кунниха кув къалар­хьхьусса, цаннияр ца ярг­сса давурттив. Ссалгу багьари ларгсса ттуршукулул 60-ку шиннардий, цалва оьрмулул дурагу 20 шинаву, художествалул комбинатрайн зун увкIсса чIумал, микку му-та дурну ххиливчIсса кьурттарал касакирттая Баширдул дурсса Н. Паганинил сурат. Муку-мукунсса мунал давурттив ккарккун, му экзаменну къадуллуна, най унува кьамул уллай ивкIссар Ттуплисуллал Художествалул академиялувун. Амма, оьрмулуву хIасул хьусса тагьар сававну, къалавгна ливчIссар Башир миву дуклан. Бюхъай муниятугу бикIан ванал щихачIав къалавхьхьусса, ца цанмава хасъсса, ляличIийссава «хатI», къуццу. Ванаву искусствалухсса ччаврил гьану бивзун бур ниттил ва хъунама уссил Ссугъурил. Гихунайрив ванал учительну хьуну ур ва цала арс куна ххирану ивкIсса Дагъусттаннал халкьуннал художник МахIаммад Юнусилау. Мунал дирхьусса дарсругу хьуну дур Баширдул оьрмулувусса пишакаршиврул хъуннамур ва агьаммур дуккавуну. Баширдул язими давурттавух дур Тарият Къапиевал «Карменнул» образравусса суратгу.
Выставкалул ахирданий Баширдул хъунама уссу Ссугъури Увайсовлул хъунмасса барчаллагь увкунни ва выставка дурсса ДР-лул Культуралул министерствалухьгу, Халкьуннал творчествалул къатлухьгу, ва кьини выставкалийн бувкIсса цинявннахьвагу, бувсунни цIанагу Баширдун дан дакIнийсса давурттив цикссагу душиву, миннувух Каспийскаллал шагьрулулмур «заказгу», амма цIанасса чIумал, къашайшиву сававну, цалсса миннул эскизру дакъа дакъашиву. Ссугъури Давдиевичлул махъ буллунни Баширдул душнихьхьун Маринахьхьун, цувгу хьхьугу-кьинигу къашавайсса буттал шанучIату ти-шинмай къахъанахъисса, мунал ялув бавцIусса. Мунилгу бар­чаллагь увкунни ва выставка дурминнахь ва ванивух гьуртту хьуминнахь, чIурчIав дунни ва выставка Башир Давдиевичлун хьунтIишиврий марцIсса гьавалул гьухьну, ссихIну.
Выставка тIитIлатIисса ба­тIаврил ахирданий, Марита Велихановнал сипталийн бувну, мунал дустурал, даврил уртакьтурал камералувун увкунни хъин-хъинсса, цIуллушиву чIа тIисса махъру ва выставкалийн учIан къабювхъусса Баширдухь цахьва учин ччисса, мунан ккакканшиврул, баяншиврул.
«Илчи» кказитрал чулухагу чIа тIий буру хIурмат бусса Башир Давдиевичлун ччясса мутталий ччаннай ацIаву, цалла караматсса давурттайну агьали ххари буллан­сса, жулва шагьрурдал диц-куц ххуй дуллансса уттигу чIярусса шиннардийсса каши-кьудрат.