Уттигъанну Ахъушинскийл цIанийсса кIичIиравусса Москавуллал хIукуматрал машиностроительный университетрал МахIачкъалалийсса филиалдануву (хьхьичIвасса Москавуллал хIукуматрал тIивтIусса университет) бавтIун бия Дагъусттаннайсса ва Аьрасатнал цайми шагьрурдаясса аьлимтал. БатIаврил савав хьуна «Актуальные проблемы прикладной математики, физики и техники» тIисса элмийсса ва практикалул конференция байбихьлай бушиву.
Конференция сакин бувну бия ва филиалданул инженерно-технический факультетрайсса прикладная математика ва механика тIисса кафедралул зузалтрал, мунил хъунама Магьдиев Арсен МахIаммадлул арснал каялувшиврийну.
Конференциялий ххалбивгьуна личIи-личIисса масъалартту.
Конференция тIивтIуна институтрал (филиалданул) «МГМУ» профессор КьурбанмахIаммадов Кьурбаннул. Мунал кутIану бувсуна филиалдануву дарс дишаву дакъассагу, хъуннасса элмулул давуртту дуллай бушиву шиву зузисса муаьллимтурал, аспирантътурал ва студентътурал. Гьарца шинал шикку шайсса дур, ацIвахъул институтрал, республикалул, щала Аьрасатнал ва чил хIукуматирттал учительтал хIаласса конференциярду. Так дукIусса шинал ва конференция сакин буллалисса кафедралийсса преподавательтурал ларсъссар кIира грант. Ва университет ххув хьуну, конкурсрай хьхьичIунсса давурттив дурну, миннал чирчуну дур 50-нния лирчусса элмулул давурттив, статьярду, бувну бур цаймигу докладру.
Конференциялул пленарный заседаниялий цалчинсса доклад бувна дурккучу, техникалул элмурдал доктор, профессор, Дагъусттаннал ва Аьрасатнал хьхьичIунсса муаьллимнал Абачараев Муса МахIаммадлул арснал. Мунал доклад хас бувну бия техникалуву аьркин шайсса, металлу цIакь дурну, лахъисса чIумуй ишла дуллан шайсса кьяйда лякъинсса давурттан. Секциялул заседаниялий мяъналул куртIсса доклад бунни РАН-далул Дагъусттаннайсса филиалданул Физикалул институтрал хъунама зузала А. Агъаларовлул. Му бия математический модель дурну, дунияллийсса хьхьирирдал циксса энергия — гуж буссарив кIул буллалисса. БувчIин бувна циксса энергия буссарив Дагъусттаннайсса Каспий хьхьирил зуманицI. Му энергия инсантурал ишла бувансса ххуллурду цукун лякъин аьркинссарив.
Ихтилат бувуна прикладной математикалул кафедралий зузисса доцент ХIажиев МахIачлул. ХIажиев МахIач ур математик, ванал бувчIинну бувсуна цалла дуллалисса давуртту ва дурмур чув ишла дуван шайссарив. Физикалул институтрал хьхьичIунсса зузала ХIажиев ХIажи ХIамзаевичлул цалва докладраву бувсунни физикалул полупроводникрал тагьардаяту, техникалуву ми цукун ишла дан хьунтIиссарив. Машинардал оьрму лахъи буккан байсса технологиярттая бувсуна доцент Н. Вагьабовлул. Конференциялий бувна цаймигу докладру.
Прикладной математика ва механика тIисса кафедралий зий бур, профессортал М. К. ХIусайханов, М.М. ХIамидов, А.М. Магьдиев, доцентътал М.М. ХIажиев, М.С. Буттаев, А.Э. Рамазанова, А.П. Салахбеков, А.М. Вагьабов, А.И. Акаев, Т.А. Адамов, С.Х. Бекова, Е.М. ХIасанбекова, аспирантътал И.М. Хаджарова, А.Ш. Ибрагьимов ва цаймигу. Щала филиалдануву зузими хIисав барча, 100-нная ливчусса дурккусса, цалла даву кIулсса преподавательтал бур. Шанма факультетраву дуклай бур 2000-нная ливчусса студентътал, миннал лахьлахьисса пишардугу хъинну цIанасса чIумуцIун бавхIусса, аьркинсса бур. Вана укунсса дур ва институтрал дуллалисса кIулшиву.
Бищун хIадур бувссар
Амин Аьбдуллаевлул
