Лакрал райондалий, администрациялул бакIчинал хъиривчу Соня Макьаевал каялувшиннаралу, хьунни нитти-буттал аякьалулу бакъасса балугъравун къабивсса оьрчIал ялув бацIайсса комиссиялул батIаву. Муний гьуртту хьунни райондалул опекалул ва попечительствалул отделданул пишакар Къисттаман Къюннуева, администрациялул балугъравун къабивсса оьрчIал иширтталсса буллалисса пишакар АхIмад ЦIаххаев, КIулшиву дулаврил управлениялул каялувчи Явсупи ХIамзаев, райондалул больницалул хъунама хIакин АьбдурахIим Дибиров.
Зулайхат Тахакьаева
Къисттаман Къюннуевал цилва ихтилатраву бувсунни хIакьину, райондалул опекалул ва попечительствалул органнал сияхIрайн лавсун, опекунтурачIа бушиву 14 кулпатравасса 17 балугъравун къабивсса оьрчI-душ. «Балугъравун биллалими сияхIрая лихлай ягу шичча чунмайкIуй бизлай, опекалул ва попечительствалул органнал сияхIрайсса оьрчIал аьдад шиная шинайн чан хъанай дур. Ларгсса шинал цаягу оьрчI-душ сияхIрайн лавсун бакъар. Мунил жула оьрчIал иш ххуйну буссар къатIутIиссарча, жула давривусса диялдакъашивурттаятур бусласисса, яни ятинну ливчIсса ва нитти-буттал аякьалулу бакъасса оьрчIал ихтиярду дуруччавриву опекалул ва попечительствалул органнащал зун аьркинсса идарарттал цаяра дагьайссаксса гьурттушинна дакъашиврияту. Ятинну ливчIсса ва нитти-буттахъал аякьалулу бакъасса оьрчIан цила чIумал кумаг бан бюхъаншиврул ми ялун личин бавриву опекалул ва попечительствалул органнащал дахIаву дикIан аьркинссар вай идарарттал: кIанттул цилакаялувшиннарал органнал; низам дуруччай органнал; балугъравун къабивминнал иширтталсса буллалисса комиссиялул; ЗАГС-рал; кIулшиву дулаврил, цIуллу-сагъшиву дуруччаврил ва агьали социальныйну буруччаврил управлениярттал», — увкунни ванил.
Ванил кIицI лавгунни цуппа зузисса чIумул мутталий 2009 шиная шихунмай вай органнал ятинну ва нитти-буттал аякьалуву бакъасса оьрчIаясса информация буллусса цавагу иш цинма дакIний бакъашиву, хIатта мукунсса оьрчIаясса информация булара тIисса тавакъюращал цуппа совещаниярттай ва прессалийхчил цимилвагу бувккун бухьурчагу. Хъуннасса вихшала дирхьунни ванил батIаврия мукьах ялув кIицI ларгсса структурардал опекалул ва попечительствалул органнащалсса даву цалийн дагьанссар тIий.
БатIаврий ххалбигьлай бия ятинсса ва нитти-буттахъал аякьалулу бакъасса оьрчIру къатрал дузал баврийн, балугъравун къабивсса ургала акъасса оьрчIал ихтиярду дуруччаврил даврил ялув бацIаврийн, мукунсса оьрчIру тарбия буллалисса нитти-буттан даву лякъин кабакьу баврийн, ахIвал кIюласса чIявусса оьрчIру тарбия буллалисса кулпатирттан дуки-хIачIиялийнусса ва янна-калийнусса кумаг баврийн багьайсса суаллу.
