Аьламрал аьламатру аьч дуллай

Дагъусттаннал паччахIлугърал университетрал Планетарий, жучIава Дагъусттаннай бакъа, Ухссавнил Ккавкказнаву цамур бакъассар. Ва Планетарий МахIачкъалаллал архитектуралул гьайкал хIисаврайгу чIюлушиннар.


ЦIурттал элму лахьхьин гъирасса, ссавних ва аьламрах эшкьи хьусса студентътурангу, дуклаки оьрчIангу ххирасса кIанур. Планетарий физика-математикалул элмурдал доктор, профессор, МАИ-лул ва РАЕН-далул академик ХIусайханов МахIаммадбаглул аякьалийн лавсун бур. Ва ур ванил хъунама. МахIаммадбаг Кьагьирович ттул шяраватуссар, 1-мур ЦIувкIратуссар, ва Дагъусттаннал лайкь хьусса учителли, Дагъусттаннал лайкь хьусса элмулул ишкка­ккур, Аьрасатнал лаваймур школалул лайкь хьусса зузалар.
— МахIаммадбаг Кьагьирович, буси Планетарийлул тарих, му та, щил сипталийну сакин був­ссар?
— Планетарий сакин бувссар космонавтика лахьхьин гъирарайсса ппурттуву, Юрий Гагарин ва Муса Маннаров аьламравун левххун махъ. Бувссия му жул ректорнал, ДГУ-лул гьану бивзсса АбутIалиб Абиловлул сипталийн бувну. Болгарнавун лавгсса чIумал, АбутIалиб тайннал планетарийлувун ивну ия, тукунсса планетарий жулвамур университет­ралгу буван аьркинссар тIий, зуву дагьну увкIуна. Мунал ва масъала сукку бувна КIулшиву дулаврил ва элмулул министерствалийгу, комсомолданул комитетрайгу. 1968 шинал хIасул дурссия планетарий буллан­сса кьюкьа студентътурая. Му даврий каялувшиву дуллайгу ивкIссар Киеврая увкIсса скульптор ва художник Д.К.Скугарев. Тай шиннардий ДГУ-луву буссия инженертал- строительтал хIадур байсса факультетгу (уттисса технический университет). Му факультетрал студентътал Лаващав планетарийлун­сса синааьрщарахагу зий буссия.

Фасадрайсса скульптурарду студентътурал цаллар ляхъан дурсса. КIира шинал лажиндарай миннал ду­ссия цIурттал залгу вив бусса къатри, цирдагу зунттавусса къатраха лар­хьхьусса. 1970 шинал залданул къуппа був­ссар, кIира шинава тIурчарив, шадлугърай тIивтIуссар. 1976 шинал ттун маслихIат бувна Планетарийлул даву бакIрайн ласун, тания шинай хIура къавхьуну каялувшиву дуллай уссара. Жул цIакьсса дахIаву дуссия кIулшивурттал обществалущал, дикIайссия мукунсса ккуран, миннал бикIайва аппаратура ва инвентарь дувайсса фабрика. Тания шиннай зий дуссар цIурттал ссавнил проектор. Тай шиннардий ххуйсса проекторъя, мунияту университет­рал машангу ларсъссия. Утти цимурца цIудуккан дуван аьркинни, гьай-гьай. Планетарий студентътурал хIарачатрайну ва захIматрайнур зий бусса.

— Мунил бияла, агьамшиву цукссари?
— Цалчинмур бияла, гьай-гьай, ва студентътуран- естественниктурансса дуккаврил гьанур, базар. Шивун бучIайссар сайки циняв вузирдава ва республикалул школарттая. БучIай районнаягу, ччянива оьвтIун бикIай, экскурсия бувара, лекция буккияра тIий, миннат буллай. Зузалтрава жу кIия инсанну шикку зий уссагу: на – директор ва ца лаборант. Гьай-гьай, билаятрал КIулшиву дулаврил министерствалулгу къулагъас дурну ччива Планетарийлул хIакьинусса тагьарданух. Жу цIана так университетрал бюджетрацIухру дузал хъанахъи­сса. На Москавлив, Садово- Кудринскойливсса планетарийлуву уссияв. Му ЮНЕСКО-лул аякьалийн лавсун бур.

Тикку дакъасса да­къар. Жу оборудование машан ларсъссия 1972 шинал, мукьцIалунниха лирчусса шинну ларгунни. Москавливгу лавгсса жулвамур Планетарийлун техника машан ласунсса мурад­райяв. Багьри ккаккайхту, на ккиз лавгунав. Яла кьювкьумур аппаратура бия 500 азарва евролун. На ректорнахь бувсъссия цукунсса багьри буссарив, мунал махъ буллунни Министерствалийн хъирив уккан, амма ихтилат чIярусса арцуя бухьувкун, иш цукун багьанссарив къакIулли. БучIи лякъинссия спонсортурал кумаг, буккарча. На дух­сса проекторданий лампардащал зий ура, ми ччя-ччяни ччучлан дикIай, уттизаманнул видеоаппаратуралул ва компьютердал кумаграцIух, къашаймургу шай бувну, цукун-дунугу даву дувару.
— Махъ ппурттуву социал сетирдай чIявусса нитти-буттахъул рязи бакъа би­кIай­ва школардай астрономиялул дарсру дукьан даврий.

— Астрономиялул дарсирдах оьрчIал мудангу гъира бикIай. Уттисса Аьрасатнал кIулшиву дулаврил ва элмулул министр Ольга Васильевал школардайн астрономиялул дарс зана даву – му астрономия аьркинну ва тIалавну душиврул барашиннар. Нюжмардий ца дарс кка­ккан дурну дур школалул прог­раммалий. ДикIуча ца дарсрагу, оьрчIан ва элмулия хаварвагу бикIанссар. ЖучIан ччарча хъуними бучIай, ччарча мюрщими. Хаснува астрономиялул элмулух гъира бикIай байбихьулул школардай дуклакиминнал. Интернетрал бияла бухьунссар, оьрчIан темалия куртIну хавар бикIай. Кувний миннал буллалисса суаллал махIатталгума ува­­ра, оьрчIан укунсса затру ча кIулссар тIий. Дуклаки оьрчIру жучIангу бучIайссар дарсирдайн, республикалул астрономиялул олимпиадагу жучIари дувайсса. Физикалул факультетрал цалчинмур ва мукьилчинмур курсирдал студентътурал астрономиялул курс лахьхьайссар, лагайссар студентътал Аьрасатнаву яла хъуними телескопру ду­сса Къарачай-Чаргаснавунгу. Зий буссар элмийсса давурттахагу. Шивусса вай циняв луттирду, астрономиялул ва астрофизикалул элмурду ахттар дуллалисса, нава чивчуссар.

— Ина увкунни байбихьулул школалий дуклакиминнал астрономиялух гъира бикIай куну. ОьрчIний аьлам­рал аьламатру лахьхьин къаччи­сса цу икIанссар? Амма му элму куртIну ва цIакьну гихуннайгу лахьлан ччисса ухьурча, ми чунни дуклан буххантIисса? Республикалий буссарив мукунминнан ххуллу? Билаятрай?
— Физикалул факультетрай астрономия лахьхьин дувай­ссар ца аралул лагрулий. Хасну му элму ла­хьхьин дуллалисса факультет ба­къассар. Москавуллал паччахIлугърал университетраву физикалул факультетрай дуклакисса 500 студентнаву ца 50-ннан лахьхьин дувайхьунссар хасну му элму. Буссар Петербурглив ва Къазаннайгу университетру. Бауманнул цIанийсса МГТУ-луву ла­хьхьин дувайссар космонавтика ва ракетостроение, мугу технический вуз бур. Щалвагу Аьра­сатнаву техникалул вузирдавун хъунисса конкурсру бур, жучIава республикалийрив экономистътурал ва юристътурал пишарду сийлий бур.

Аьрасатнаву физикалул ЕГЭ машгьурну дур, кIилчинмур кIанттай дур, жучIарарив – махъра-махъмур хху­ттай. Репетитортал бувгьуну лахьлахьимигу я Бауманкалувун, ягу физтехрайн, ягу МФТУ-лувун дуклан най бур, чIявуми цайми регионнайн най бур. Гьаннайсса, точный элмурдахун багьну бакъар республикалий. Мяйжанссар, ЕГЭ- лул дуккаврива дакI дуккан дур­ссагу бур. Ва зат бувчIуну, Москавлий чантIа тIий бунуккар оьрчIал цIакьсса ва куртIсса кIулшивуртту дуну ччими. Школардай хIакьину ххуйсса даражалийн гьаз дуван аьркинну бур кIулшивуртту дулаврил даву, ЕГЭ-лул муттаэтал чIяву хъанай бур. ДипломирттачIан ва баллачIан кIункIу-хъит къатIий, кIулшивурттал хъирив багьарча, иш къулай хьунтIиссар. Дуккаврил бюхъу-гьунар бусса оьрчIрурив Дагъусттаннай ччиссаксса буссар. МиннацIун кабакьинни аьркинсса. Агар жува билаятрай ттизаманнул тIалавшиннардан ччикунсса, хъит кусса, хьхьичIунсса инновациялул производство хIасул дуван ччай бухьурча, чара бакъа тIалавну ва бусравну бикIантIиссар техникалул элмурду куртIну кIулсса пишакартал.

Астрономиялул элмулух гъира бусса, Планетарий ккаккан бучIан ччисса бухьурча, на хIадурссара кумаг буван, экскурсия бангу, лекция буккингу.
Жул телефонну: 8-928-277-28-91 ягу 56-20-82; 65-25-85. Планетарийлул адрес: Батырайл цIанийсса кIичIиравалу, 2. (2-мур базаллуйн лажинсса университетрал комплекс­рал хIаятраву).

— МахIаммадбаг Кьагьирович, барчаллагь ихтилат­рахлу!

Ихтилат бувссар
ПатIимат Рамазановал