[dropcap]А[/dropcap]ьрасатнал лачIун буккаврил федерациялул президентнал кIанайма, лачIун буккаврил Дагъусттаннал цачIундур командалул хъуна-хъунама тренер Сажид Сажидовлул бувсунни 2018 шиналЕвропанал чемпионатрай гьуртту хьунтIисса национал командалувун багьан бувминнал цIарду.
— Европанал чемпионатрай гьуртту хьун Аьрасатнал цачIундур командалувун бувхминнал сияхI балжину дузал хьун дурар. Ми кIул хьунтIиссар махъра-махъсса батIаврий. На шикку бусанна Ярыгиннул турнирданий язи бувгьусса лачIунбуккултрал цIарду: Заур Угуев (57 кило), ХIажимурад Рашидов (61 кило), Илияс Бекбулатов (65 кило), МахIаммад Кьурбанаьлиев (70 кило), АхIмад ХIажимахIаммадов (79 кило),
Аьвдурашид Сяъдуллаев (92 кило) ва Мурадин Кушхов (125 кило). ЖучIава ур ялагу Расул МахIаммадов (97 кило), ванал Ярыгиннул турнирданий 2-мур кIану бувгьуссар. Умуд бур цачIундур командалул тренертурал мугу итаншиврий гьуртту хьун, — увкунни Сажид Сажидовлул.
ЦачIундур командалул капитан, олимпий чемпион Аьвдурашид МахIаммадовлул Владимир Васильевлухь барчаллагь увкунни цивппа дакIнихтуну кьамулгу бувну, тIайлабацIуртту чIа учаврихлу.
ХIадур бувссар
ХI. Аьдиловлул
