ХIабиб НурмахIаммадов зана хьунни, UFС-рал чемпионнал мухIлугу ларсун

[dropcap]А[/dropcap]прельданул 9-нний цIуну хьусса UFС-рал чемпион ХIабиб НурмахIаммадов Дагъусттаннайн зана хьунни, мунал цащалла ларсун увкIунни бусравсса чемпионнал мухIлугу.


МахIачкъалаллал аэропорт­рай ХIабиб хьунаакьин бувкIун бия республикалул каялувчинал вакилтал, гъан-маччами, дустал ва мукунма ттуршахъул ватанлувтал.
ХIабиб зана шаврил шадлугърал митинграй ихтилатру буллалиминнал хъунмур мяънагу, мурадгу ХIабиблухь ххувшаву барча чаву дия.

«Жу ва мурадрайн биян хIа­рачат буллай бивкIссару 6 шинал мутталий, ХIабиблул тамансса шарикьтал (болельщиктал) бур, на барчаллагь тIий ура гьарца шиккун увкIманахь, нагу зущал кIидачIлай ура ва жулла ххаришиву», — увкунни ХIабиблул буттал Аьбдулманап НурмахIаммадовлул.
ХIабиб НурмахIаммадов барча унни ДР-лул ХIукуматрал председатель Артем Здуновлул:

— Барча вил тарихравун дагьсса ххувшаву. Му ххувшаврил вил цIа чичинтIиссар ватандалул спортрал тарихраву. Цимигу шин хьунни ина жулла республикалулгу ва щалва билаятралгу цIа гьаз дуллай. Ина цинявннан кIулла ва циняв вия пахрулий бур. На дакI дарцIуну ура укун­сса ххарисса хьунабакьавуртту жулла уттигу чIярусса хьуншиврий, — кунни ванал.

ХIабиб барча уллалисса махъру ялагу лавхъунни ДР-лул Халкьуннал Мажлисрал председательнал хъиривчу СайгидахIмад АхIмадовлул, ДР-лул физкультуралул ва спортрал министр МахIаммад МахIаммадовлул, лачIун буккаврил олимпий чемпион Аьвдурашид Сяъдуллаевлул.
Махъ лавхъунни цалва ХIа­библулгу:

— Хъинну захIматну бия макьу дакьин дан, сантирайн учIан, цанчирча сайки ца нюжмардул дянив ххюя муттаэ аххана унни. МухIулттул цIаний иян багьлайгу бухьувкун, бигьану къабикIай дакI паракьат дуван, цалийн учIан, личIи-личIисса пикрирдал кьуцIу уллалисса чIуннугу шай. Амма му ишираву кумаг шай чIарав ттулва дус-къардаштал, ххуйсса команда, дакI тIайласса инсантал бушиврия. Ялувсса Занналгу ттуцIун кабакьлай ур, — увкунни ванал.