Май зурул 21-нний жула республикалийн хъамалу бувкIунни Ашттарханнал областьрал шагьрулул губернатор Александр Жилкин, Чачаннал республикалул парламентрал председатель Дукуваха АьбдурахIманов. Ва кьини Каспийк шагьрулий «Седой Каспий» тIисса экспертрал форум тIивтIунни.
Имара Саидова
Форумрал даву хас дурну дия «Культурные коды и ценностные основы горных цивилизаций» тIисса Ккавкказуллал ва Дагъусттаннал халкьуннан хъинну хъуннасса агьамшиву дусса масъаларттан. Форумрал даву дайдирхьунни Дагъусттан Республикалул президент Рамазан АьбдуллатIипIовлул. Ванал кIицI лавгунни, Дагъусттан Республикалул Халкьуннал Мажлисращал уртакьну ххалдигьлай бушиву зунттал кIанттурду мюнпатну ишла буллансса 2014-2018-ку шиннардийнсса программа.
— Щак бакъар ва буниялагу хъинну хъуннасса агьамшиву дусса, дузрайн дуккан дан аьркинсса программа душиву. Бюхъайссар ва программа дузрайн дуккан дансса арцу республикалий къаляхълангу, амма ва программа республикалий чара бакъа аьркинну дур. Дагъусттаннал аьрщарай 44% зунттал кIанттурдал бур, 1166 шяравалу дур лахъми зунттаву. Амма цалсса ттигу билаятрай дакъар зунттал районнал маэшат, иш-тагьар гьаз дувавриха зузисса программарду, — увкунни Рамазан АьбдуллатIиповлул.
Александр Жилкиннул увкунни:
— Астраханнал областьрай Дагъусттаннал диаспора биялсса бур, миннува чIявусса бур дагъусттаннал депутатътал, гьунар бусса хIакинтал, бизнесментал. Дагъусттаннай дур сайки 6000-нния лирчусса тарихрал гьайкаллу. Мунилгу исват буллалиссар республикалул тарих авадансса бушиву. Культуралул агьали куннащал кув дус буллалиссар, хIала-гьурттусса давурттив дуллали буллалиссар. Жул региондалий культуралул давурттах хъуннасса къулагъас дуссар. На дакI дарцIуну ура Астраханнал областьрал опыт уссурвалсса Дагъусттаннангу бучIи лякъинтIишиврий, зунттал районну гьаз даву мурадрайсса проектругу Дагъусттаннай тIайлабацIу буну бартдигьлантIишиврий, — куну.
Шиккува ххи банну, экспертрал форум «Седой Каспий» Ккавкказуллал къайгъурдайсса аьлимтал, политиктал, жяматийсса ишккаккулт лагма лаган буллалисса даву душиву. Му форумрал лагрулий Ашттарханнал областьрал ва Дагъусттан Республикалул хIукуматрал машлуву, экономикалуву, элмулуву, техникалуву, социал иширттаву ва культуралуву хIала- гьурттуну зунсса кьутIи чичинтIиссар. Хъамаллурал ккаккан дурссар республика хьхьичIуннай даву мурадрайсса инвестицион проектругу.
Ашттарханнал паччахIлугърал ансамбльданул ва «Мир Вашему дому» тIисса творчествалул коллективрал вара кьини хъуннасса концерт ккаккан дунни.
