Майрал 14-нний МахIачкъалаллал Кировуллал райондалул бакIчи СалихI Сагидовлул администрациялул зузалт кIул бунни цIуну бивтсса цалва хъиривчутуращал ва кумагчинащал.
Райондалул бакIчинал хъиривчуну ивтунни уттинин Кировуллал райондалул ЖКХ-лул отделданул хъунаману зий ивкIсса МахIаммад Юсупов. Райондалул ЖКХ-лул отделданул хъунаману ивтунни уттинин ТIиларатIиял райондалий личIи-личIисса каялувшиврул къуллугъирттай зий ивкIсса Щейх ГьитIинов.
Райондалул бакIчинал цамагу хъиривчуну мукуна ивтунни вара райондалул бакIчинал кумагчину зий ивкIсса МахIаммадзакир Закарияев. Мурахас хьусса кумагчинал къуллугърай ивтунни хьхьичIва ЦIуссалакрал райондалул бакIчинал кумагчину зий ивкIсса Абакар Къапланов.
ЦIуну бивтсса къуллугъчитуращал зузалт кIул буллай, СалихI Сагидовлул бувсунни райондалий тамансса щаллу буллансса масъалартту бушиву ва ми бакIуйн буккан буллан аьркинну бушиву хIала-гьурттуну зий.
«ХIакьину жулва хьхьичI чIявусса масъалартту бур. Ттул пикрилий, жува гьарцаннал цащава шайсса хIарачат бан аьркинни ми щаллу баншиврул ва жулва шагьру ххуйсса даражалийн биян баншиврул», — увкунни СалихI Сагидовлул.
Райондалул ва шагьрулул каялувчитурахь цайнна вихшала дишаврихлу барчаллагь увкунни цIуну ивтсса хъиривчу МахIаммад Юсуповлул.
Ва нюжмардий Кировуллал райондалул администрациялул бакIчи СалихI Сагидов ва цаппара зузалт хьунабавкьунни Агъабабовлул кучалийсса 8-мур, 17-мур, 26-мур къатраву ва Замановлул кучалийсса 4-мур къатлуву яхъанахъисса инсантуращал.
С. К. Сагидовлул, циняв квартирарттавун ивну, тикку яхъанахъиминнан бувчIин бунни, аьркинну бушиву кугьна хьуну лекьлакьисса къатрава цайми къатравун бизаврил хIакъиравусса кьутIирду чичин. Цаппара тикку яхъанахъиминнал тиккура чирчунни кьутIирду. СалихI Сагидовлул бувсунни, МахIачкъалаллал бакIчинал кIанайма М. В. Сулаймановлул райондалул администрациялул хьхьичI масъала бивхьуну бушиву анаварсса мутталий инсантуращал кьутIи чичин кугьна хьусса къатравату бизан баврил хIакъираву ва га даву ттинияр тихуннайгу дачин даншиву. Хьунабакьаврий мукунма гьуртту хьунни Кировуллал райондалул бакIчинал хъиривчутал М. Юсупов, М. Закарияев ва цаймигу.
ХIасан Аьдилов
