Гьунар бусса оьрчIансса республикалул ЧIяру профиллу дусса лицей-интернатрай
хьунни аттестатру буллалисса шадлугъ.
Ва кIулшиву дулаврил идара тIивтIуну хьуну дур зувиллийсса шинну ва хIакьину му бюхттулну лавсун най бур Дагъусттаннал кIулшиву дулаврил ттугъ, ккаллину бур Ухссавнил Ккавкказнаву ца яла хьхьичIунсса цIусса журалул идаралун.
Шиная шинайн лицейраву дуклакиминнал ккаккан дуллай бур хьхьичIунсса хIасиллу билаятрал яла сий дусса площадкарттай.
ТIайлабацIусса хьунни яла нанисса дуккаврил шингу лицейран – 55 дуклаки оьрчIал бувгьуну бур хьхьичIунсса кIанттурду Щалагу Аьрасатнал олимпиадалул республикалул ятIапрай. Вайннавагу 16-ннал бувгьуну бур цалчинсса кIанттурду.
Гьашину лицей къуртал буллай ур 165 оьрчI, вайннава 67 ур медальданийн хъит тIутIисса.
ХIакьинусса кьининийн 2 хьуну ур оьрус мазрал ЕГЭ-лул 100 баллданунсса кIулшиву ккаккан дурсса – Наида АьбдурахIманова ва Вадим Ледванов.
Жамбулат Бальгишиев тIурча, ххув хьуну ур РАНХиГС –рал гьанулий хьусса Щалагу Аьрасатнал ингилис мазрал олимпиадалий. Ва ххувшаврил цангу тIивтIуну бур Аьрасатнал яла хьхьичIунми вузирдавунсса ххуллу, экзаменнурагу къадуллуну.
Дуккаврил шинал хIасиллая буслай, лицейрал директорнал буржру чIумуйну биттур буллалисса Альбина Шутуновал кIицI лавгунни, школа къуртал бувми бушиву ялун бучIантIимунийн хъуннасса вихшала дишин буллалисса оьрчIру.
Коллективраву зузисса чIявуми педагогтал бур элмулул кандидатътал, архIала республикалул вузирдавугу зузисса.
Хъуннасса вихшала дур педагогтурал школа къуртал бувминнайн.
