Июньдалул 27-нний МахIачкъалалив, Дагъуттаннал паччахIлугърал филармониялул Гъинтнилмур майданнив, хьунни ва кьини Аьрасатнаву кIицI лагайсса Жагьилтурал кьинилун хас дурсса концерт. Му сакин дурну дия Дагъусттан Республикалул Жагьилтурал иширтталсса байсса министерствалул. Генеральный партнерну бия машлул къатта «Къиргъу».
Концерт хьуна, махъ ппурттувусса сайки циняв шадлугъру кунна, онлайн кьаралданий. Ттизаманнул технологиярттал каширду ишла дурну, муних бурган бюхълай бия министерствалул Инстаграмрайсса страницалий ва «ГБУ Дагестан-Концерт» Ютуб-каналданий.
Концертрай гьуртту хьуна республикалул вузирдал студентътал, Дагъусттаннал филармониялул артистътал, шагьрулул ОьрчIал искусствалул 1-мур школалул тарбиялувтал, «Проявление 05» фестивальданул гьурттучитал. Ва Кьини барча дуллалисса махъ лавхъуна Дагъусттан Республикалул жагьилтурал министр Камил Саэдовлул. Цалва ихтилатраву министрнал, пандемиялущалсса талатаврил давурттаву бикIу, цайми-цаймигу иширттаву бикIу, хьхьичIун ливчусса жагьилтурахь барчаллагь увкуна.
Махъру ялагу лавхъуна «Къиргъу» машлул къатлул компаниярттал группалул директор АхIмад Муртазялиевлул ва ДР-лул Ветерантурал советрал председатель МахIарам Аьлиджановлул. ХьхьичIун ливчусса жагьилтуран дуллуна бахшишругу.
