Мукьра-ххюра шинал хьхьичI на, шагьрулий яхъанахъисса инсан, щалва ттулва кулпатращал гъинттул буттал шяравун Вихьлив отпускалий увкIун игьалаглай уссияв. Ца кьини жу лавгссияв шяраваллил къинттуллух бивхьусса Валттуялу тIисса кIанттал чулинмай, сайрданий.

Шаппай най бунува бувссия цавай ишттахIну янхьа тIисса кьункьал бувцIусса тIутIал кацIру, жува уттубишайсса къатраву бишин. Шяраваллил зума-къирагъирайн бивсса чIумал жун бакIрайн багьуна ца гъансса хъамитайпа. Ганил, жуй бювкьу-аьй дуллай, хъяхъаву дуруна: «Туристал кунма занай, инсантал хъяхъи мабулларду», — куну. Жу га хъамитайпалул мукъурттил гьанавиххи бувнав, тIабиаьтрайн сайрданий лагаву тIул дакъашиврун ккалли баврил.
Утти, ва макьала чичлачи­сса чIумал, ттул столданий бур кIива Лакку тIутIал кацI, ца ялагу бур тиккунмай бивхьусса телевизорданул ялув. Ва на щяивкIсса къатлувусса тIутIая нанисса ишттахIсса кьункьал хъис личIишиву дакъар вай тIутIив дурсса шяраваллил баргъбуккавал чулий бивхьу­сса Чаралихалу тIисса лухччал дянив авцIусса чIумалнияр. ТIутIал кацIру бувсса лухччивгу хьхьичIара бакIлахъия дугьайсса хъуруну дикIайссия. Уттирив, цаппараннал тиву-шиву нувщи бугьарча бакъа, хъуру ххалазандаран итадаркьуну дур. Мукунна цайми кIанттурдайсса хъуругу.
Ттулла даву багьана хьуну ( «Илчи» кказитрал Ккуллал райондалийсса корреспондентну), шагьрулия Лаккуйн ялапар хъанан увкIун дурусну ца шин ва дачIи хьунни. Ва чIумул му­тталий ганиннин ттунма чIалай бивкIсса, аькьлу-кIулшилул луртамалувусса чIявусса зат­ру щялусса бивкIшиву чIалан бивкIунни. Миннувасса, яла ттулва аькьлу-кIулшилул кьамул къабуллалисса, затну хъанай бур Ккуллал райондалий яхъанахъисса инсантал чIявуми щийнчIаврагу вихшала дакъа бушиву. Ца-кIива гьантлул хьхьичI Украиннава ливхъун бувкIсса лихъачалтран кумагран арцу датIлатIисса чIумал, ккурчIав щябивкIсса инсантал: «Ми арцу аьркиннийн къадиянтIиссар», — тIий цивппа жагь-жигьну бушиврияту буслай бия. Ялагу вайннал кIицI бувуна: «1999-ку шинал шяраваллава дартIун гьан дур­сса лихъачалтрансса лаххия авлахърайн экьидирчуну ккаккан дуллай бия телевизорданувух», — куна. Вай на цIана кIицI був­сса затру ялун уруган куннищал кув бавхIуссану къачIаларчагу, явара дахIаву дакъасса затругу бакъар. ТIутIал кьанкьгу, инсаннайнсса вихшалагу, Лакку билаятрал тIабиаьтрал аваданшивугу лаласун къабюхълахъи­сса чIумал, аьрщараха къуллугъ буллан къаччисса чIумал, му инсаннал оьрмулул шаттирду кутIа хъанахъисса чIунни.
Ттун ккавкссар ца чIумал Къаяккантуллал райондалийсса Къаяккант тIисса шяравасса ца гьалмахчунал (духьунссия ганан 60-луннивун дирсса шинну) цалалу ца гектарданияр хъуннасса мурзусса аьрщарай лахIунтту дурну (оьрус мазрай вайннуйн террасарду учай) мукунсса багъ-бахча бувунахха, ца-кIира шинал мутталий ду-дакъасса ахъулсса ва ахънилсса хьун дурна.
Ттун кIулли ларгми шиннардийгу гьашину куннасса, оьрус мазрай учиннача, «шикарний­сса» гьавалул тагьар Лаккуй диркIшиву. На оьрчIсса чIумал жу, чIаххуврал оьрчIру, гъин­ттул ниттихъал дурсса урттуйн чирчригу дирчуну, цIияллай хьхьувай уттубишайссияв. Утти хьхьувай кьатIув увккун, хъисрагу чIаракIлу дакъасса хьхьуну, хьхьичI цIив щяивкIун, чаннава-чаннасса зурухгу ялугьий, щугълурдавун лавгсса чIумал, буниялагу жулва Лакку билаятраяр ххуйсса кIану цамур бакъаний кунма чIалан бикIай. Хъинну дюрхъуну дур гьашину лухччигу. Уттира никирттаяр ларайну дур уртту ххярххун. Ттурши букканнин хъиннура дюхъанссар.
Ва Лаккуйсса тIабиаьтрах ябитлатисса чIумал ттул бакIравун бувххунни ца цамургу пикри. Ялун нанисса шиннардил мутталий гьич ший яхъана­хъисса инсантурал ятту-гъаттара ябуварча дакъа, бакIлахъия дугьлан кунма ттун чIалай ба­къар. Мунияту кIира-шанна шинал хьхьичI цумурдив ца экономикалул иширттан хас дурсса форумрай Путиннул кIицI бувуна жучIарасса аьрщи «зуншиврул» чил хIукуматирттай куннасса ранчарду, фазендарду дуллан аьрщи инсантурахьхьун дулун багьлай бушиву. ТIайлар, Путиннул увкумур законнайну хьуншиврул, законну аьркинну дур. ХIакьинусса кьини ттул аькьлулул цамур чулинмайсса затру хъинну архну бушиврияту буслай бур. Бусанссар аьрщарал масъалартту ххуйну кIулминнал цалвами пикрирдугу.