Уттигъанну Гуржиял хъуншагьру Ттуплислий хьунни «Составление словаря картинками» цIанилусса семинар. Ванил сакиншинначитал хьунни SIL International тIисса дунияллул халкьуннал коммерческий дакъасса идара.
Дунияллул халкьуннал даражалийсса лагрулувун дурхсса SIL International хъанахъиссар ООН ЮНЕСКО-лул маслихIат ккаклакисса идарану. SIL International идаралул лингвистал буссарАзирбижан республикалийсса Ккавкказуллал мюрщи миллатирттал мазру буруччаву, ябаву мурадрайсса цачIусса давурттивгу дуллай. Ва идаралул даврил агьаммур мурадгу мюрщи миллатирттал мазру гьарта-гьарзану лавхьхьуну, ххалбивгьуну, таржумартту хьхьичIуннай давур. Му бакъассагу, вай масъаларттаха зузисса идаралувун хIакьинусса кьини ухлай ур 50-нния ливчусса билаятирттаясса 6000-хъул инсан. Уттинингу вайннал дурссар цикссагу мюрщи миллатирттал мазру лахьхьаврил, буруччаврил хIакъиравусса хIасиллу. Цуппа ва семинарданул жаваблувсса координатор, лингвистикалул консультант, Ттуплисливсса вай мазурдиха зузисса офисрал каялувчи, Американавасса Сакээт Кэтлиннул куртIну лавхьхьуну бур ва ххал бивгьуну бур цIахъюрдал маз. Шиккусса цаймигу лингвистал зий бур рутуллал ва агъуллал мазурдиха. Ва семинарданий гьуртту хьунтIисса Дагъусттаннаясса инсантураягу хъунмур тIалавшинна дия куртIну маз кIулшиву, ва му цайминнангу лахьхьин бувансса сантирай зун кIулшаву. Укун хъинну агьамшиву дусса давриву гьуртту хьун лакрал миллатрава язи бувгьуну бур мяйжаннугу лакку маз гьарица чулуха куртIну лавхьхьусса, ххалбивгьусса, тарихрал элмурдал кандидат, журналист, публицист Мусаев Сулайман АхIмадович ва МахIачкъалаллал 16-мур школалул лакку мазрал дарсирал учительница Аьлиева ПатIимат Юсуповна. Циняв шиккун оьвкуну бувкIсса, мюрщи миллатирттал мазурдиха зузиминнал дянив баян бувну бивкIссар цумур мазрай циксса гьарзасса махъру бурив ххалбаву мурадрайсса конкурс. Му конкурс баян бувния шихунмай ПатIимат Аьлиевал ва Сулайман Мусаевлул бавтIун бур 600-нния ливчусса махъру. Ва даву цащала архIал дузрайн дуккан дуван Сулайман Мусаевлул вихшала дурну дур цикссагу шиннардий шагьрулул школардай оьрчIан лакку маз лахьхьин буллай зузисса учительница ПатIимат Аьлиевайн. Шиккува кIицI лаган, ПатIимат Аьлиевал хIадур бувсса оьрчIру цимилгу ххув хьуссар ниттил мазурдин хас бувсса конкурсирдай. «Ниттил мазрайсса суратирттайну» тIисса луттиран хасъсса даву хIадур дуркун, жулла республикалиясса цаймигу миллатирттал лингвистуращал вайгу гьуртту хьуну бур Ттуплисливсса семинарданий. Уттинин Азирбижаннал республикалий шайсса та семинаргу ва ххуллух Ттуплислив бан маслихIат хьуну бия. Миллатирттал мазурдийсса словарьдал презентация дурну махъ, яргсса суратирттайсса ххалбигьаву мурадрайсса словарьду итабавкьунни. Вай словарьду цивппагу мяйжаннугу, школалий бикIу, укунма, ичIува бикIу, суратирттайхчIин бигьану маз лахьхьин гъира буминнан бучIисса бур. Ва аьрххилия буслай, ПатIимат Аьлиевал кIицI ларгунни та семинарданий мазру ябаву, буруччаву, бухлаган къабитаву мурадрай та идаралул дуллалисса агьамсса давурттив.
«Ниттил маз суратирттайну» тIисса словарьдал презентациярду дурну махъ, шикку гьуртту хьуминнан дуллуну дур лавайсса даражалий семинарду тIайла бувкшиврийсса сертификатругу. Му бакъассагу, циняв мюрщи миллатирттал мазурдийсса словарьдал ца-ца экземплярдугу итабавкьуну бур.
«Ниттил маз суратирттайну» тIисса лакку мазрайсса луттирал сакиншинначиталгу бур Мусаев Сулайман ва Аьлиева ПатIимат. Ва луттирал бур махъру тIайлану чичин ккаккан буллалисса, суратирттал кумаграйну дакIний битан бигьасса, щил ва цукун ишла бан аьркинссарив бусласисса хьхьичIмахъгу. ХIасил, вагу ца ххаллилсса даву хъанай дур жулва лакку маз къакIулми хъис бунугу чан шавриву.
Дагъусттаннаясса делегация хIайран хьуну бия хъинну хьхьичIавасса Ттуплис шагьрулийх семинарданул ахирданий бувсса экскурсиялия.
