ЗахIматну къашавайминнаха, хъунив хьуминнаха аякьа дуллалисса инсантуран арцуйнусса кумаг баву мурадрай, паччахIлугърал ккаккан дурну дур лахъаву дансса арцу (компенсационные выплаты). Ми дулланшиврул чара бакъасса шартIну хъанахъиссар аякьа дуллалисса инсаннал я харж, я пенсия ягу даву дакъаманал ласайсса пособие къаласаву.
Гьар зурухсса компенсациялунсса напакьа булайссар: 18 шин хьуннинсса инвалидсса оьрчIаха, мукунма хъунив хьуминнаха аякьа дуллалиминнан, аякьа дуллан хIакинтурал ккаккан бувну бухьурча; ягу оьрмулул 80 шин хьуминнаха аякьа дуллалиминнан.
2013 шинал январьданул 1-нния шинмай 18 шинавун ияннинсса инвалидсса оьрчIаха, оьрчIнияцIава 1-мур группалул инвалид хьусса инсаннаха аякьа дуллалисса ниттин ягу буттан ягу арсшиврий (душшиврий) ивхьуманан дулайссар 5500 къуруш, ливчIминнан тIурча – 1200 къуруш (Аьрасатнал Президентнал хIукму № 175. 20. 02. 2013 «О ежемесячных выплатах лицам, осуществляющим уход за детьми – инвалидами).
ЧувчIав къазузисса, амма зун бюхъайсса 1-мур группалул инвалиднаха аякьа дуллалисса ягу хъунав хьуманаха аякьа дуллалисса инсаннан ккаккан дурну дур 1200 къуруш. Ми арцурду дулайссар аякьа дуллалима зун къашайманал маччасса, гъансса инсан акъахьурчагума, гай цачIу ялапар хъанай бакъахьурчагума. Ми компенсациялул напакьалул арцу цирда пенсия ласайманал цIаний дишайссар, пенсиялущал цачIугу дулайссар. Ми дулайссар зунма багьайсса Пенсиярттал фондрал отделениялул, мунияту зун къахъанахъима, ягу хъунав хьума (80 шинавун увхма) лагайссар кIа цалла райондалул Пенсиярттал фондрайн. Заявление чичин аьркинссар кIивагу чулуха – пенсия ласайманалгу, аякьа дуллалиманалгу.
Заявлениялущал цачIу дикIан аьркинссар 18 шинавун ияннинсса оьрчI (душ) инвалид ушиврул хIакъираву хIакиннал дуллусса медициналул заключение, хъунав хьуманаха аякьа дикIан аьркиншиврул хIакъиравусса, инвалид хьуну ушиву тасттикь буллалисса ягу медико-социальная экспертизалул барашин дуллалисса актравасса выписка.
Цащалва бикIан аьркинссар паспорт ва захIматрал книжка кIинналвагу.
ДР-лул инсаннал
ихтиярдал уполномоченныйнал макьала лаккунайн
дурцуссар
ХIасан Аьдиловлул
