Вай гьантрай республикалул ФСКН-лул управлениялул къатраву хьунни пресс-конференция. Микку гьуртту хьунни управлениялул хъунама Энрик Муслимов ва пресс-службалул хъунама Ширинбек Шихабидов.
Андриана Аьбдуллаева
Пресс-конференция тIитIлай, Управлениялул хъунаманал дакIнийн бувтунни республикалий сентябрь зурул 15-нния байбивхьуну октябрь зурул 15-ннийн бияннинсса барз наркотикирттайн къаршисса барзну баян бувну бушиву ва муницIун бавхIуну цала зузалт хъиннува чялишну зий бушиву.
— Нажагьссавагу бакъахьунссар хIакьину наркотикирттая цуксса нигьачIаву дуссарив, миннуя жула билаятрал экономикалун ва мюхчаншиврун цуксса зарал биллай буссарив къабувчIлачIисса. ФСКН-лул статистикалул чIалачIи буллай бур наркомантал ва миннал дурсса тахсиркаршивуртту чIяру хъанай душиву.
Наркобизнесрал доходру муксса хъунисса дурхха, тахсиркартурал группировкартту цуксса нигьачIаву дунугу махъаллил хъанай бакъар, я харж дуллалимуних буруглай бакъар. Контрабандалул гуж-каши хъуннасса дур. Жула хIукуматрай щурущисса наркотикру чIявуми дазул кьатIату лавсун букIлакIисса бур.
Шиная шинайн дазул кьатIату жучIанна ларсун букIлакIисса продукция, кьай-кьуй чIяру хъанай дур. ЧIяву хъанай бур мукунма наркомафиялул кьюлтIну Аьрасатнавун гьан буллалисса героин ва цаймигу гужсса асар биян байсса затру (СВ). НаркотикирттацIун дархIусса тагьар хъинну чIурусса, хъунмасса буруккин бутлатисса дур. Мунияту хIакьину жунма мугьлат бакъа, цинявппа ца хьуну, къарши бацIан бур ва балаллуйн. ХIакьину гьарицагу управлениялул зузалан ккаккан дурну дуссар, наркотикирттан ххуллу кьукьаву мурадрай, гьарица кьини дуллансса давуртту.
Гьар мудан кунма, хIакьинусса кьинигу жул идаралул агьаммур буржгу, мурадгу наркотикру бахху-ласу буллалисса сакиншиннарайсса группардайн къарши бацIавур. Гужсса рищаву дурну, миннал экономикалул гьанурду хIуркку бавур.
Управлениялул оператив составрал ва силисттачитурал хъунмасса хIарачат буллай буссар контрабандалий наркотикру лавсун букIлакIисса ххуллурду лакьин, ми хIадур буллалисса ва ябуллалисса кIанттурду ашкара бан. Ихтиярду дуруччай органнал ляличIисса къулагъасралун лавсун буссар Дагъусттаннайн наркотикру лавсун букIлакIисса каналлу лакьаврил масъала.
Республикалий чIявусса наркотикру щуруй бушиврун багьана хъанай бур жува наркотикру хъинну ппив хьусса 5 хIукуматрал дазуй бушиву, Аьрасатнавун нанисса сайки циняв наркотикру жула аьрщарайх най бушиву. Махъсса шиннардий чIяву хьунни республикалийн Дянивмур Аьрасатнава наркотикру лавсун букIлакIисса ишру.
Наркодилертурал личIи-личIисса журалул наркотикру тIайла буклай бур Москавлия ва Санкт-Петербурглия. Нанисса шинал хьунни ишру республикалийн героин, гашиш лавсун бувкIсса, — бувсунни Э. Муслимовлул. Хъирив управлениялул хъунаманал ва пресс-службалул хъунаманал журналистурал суаллахьхьун жавабру дуллунни. Миннал тIивтIуну ккаккан бунни зевххусса гашиш (10 пластинка) ва кьуцуру героиндалул. 1 гр. укунсса гашишрал дусса дур кIиазаллийхъайсса къуруширттан, героиндалул тIурча – 5000 къурушран. ХIисав дувара, цуксса доход дур ми бахлахиминнан.
Ахирданий вайннал бувсунни управлениялул давривасса цаппара аваза бувтсса иширттая.
