Лакрал райондалул администрациялул актовый залдануву хьунни райондалул жагьилтурал конференция. Микку ххал бивгьунни Лакрал райондалийсса жагьилтурал политикалул цIанакулсса тагьарданийн ва му хьхьичIуннай даврийн багьайсса суаллу. Муния махъ бувчIунни Дагъусттаннал жагьилтурал съездрайнсса делегатътал.

Конференциялий гьуртту хьунни райондалул идарар­ттал зузалт ва гьарца шяравасса делегатътал.
Конференция тIитIлай, райондалул администрациялул бакIчи Абакар Къюннуевлул бувсуна махъсса шиннардий райондалий дурсса, дуллалисса ва дан дакIнийсса давурттая.
«Райондалий буллалисса школагу, социал объектругу, ххуллурдугу зунни буллалисса. ТIайлассар, цIанакул щалва билаятрайва жагьилтал ссуссукьу буллай бур. Дипломру, кIулшиву духьурчагу, зунсса давуртту дакъар. Амма райондалул бакIдургьуми жула дайдихьурттал, давурттал чIарав бацIан бюхъайсса, кIулшиву ду­сса, гьунар ххисса жагьилтурал аькьлулух, бажарданух мюхтажну буру. Райондалул бучIантIимур зул кIунттихьри бусса. Мурад Къажлаевлуя ва Муса Маннаровлуя пахру къабансса лаккучу цаягу акъассар. Зугу хIарачат бувара зулла цIарду тарихраву кьаритан.
Тамансса ттуршукурдал хьхьичIва цивилизациялул центрну бивкIсса Гъумукгума хIакьину аьвам­шиву ялтту дуклай дур. Аьвам­шиврияр балардугу ялун нанисса. Дин сававнугума куннан ку къабувчIлачIисса ишру чIявуну тикрал хъанай бур. ХIатта бусурман дин машгьур дуллай бивкIсса хьхьичIунсса диндалул ишккаккулт жулва тамансса бивкIхьурчагу, Дагъусттаннай цалчинминнувасса мизит Гъумук бивкIхьурчагу. Жулва буттахъул диндалия ят бувцун бивкIхьурчагу, буттал буттахъая яхьуну дур диндалул аьдатру. Ми аьда­тирттайх бачирча жува диндалул ххуллийх, цукунчIавсса хIусутшиву, куннан ку къабувчIаву жула дянив къадикIантIиссар.
Оьрмулул шартIру, халкьуннал ахIвал ххуй хьуну бухьурчагу, мяърипат ялу-ялун яларай дагьлай дур», — увкуна Абакар Къюннуевлул.
Конференциялул делегатътураву чIявуми учительтал бушивугу хIисавравун лавсун, администрациялул бакIчинал кIицI лавгуна хьхьичIва дуклаки оьрчIру дарсирдая махъ учительнал итталун багьан ламусну бикIайсса бивкIшиву, цIанакул тIурча ссуг дангума ма­хъаллил хъанай бакъашиву. ХьхьичIва учительнал хъув даву дан ххарил литIавай бивкIхьурча, хIакьину учительнал хьхьичIа даву данну багьа тIалав буллай бушиву. Вай зунтталчунал хасиятран къалайкьсса тIуллур, — увкуна.
— Бюхъай учительтурайгу тахсир бикIан, амма учительнал оьрчIахь махъ увкуну бухIлай бакъар нину-ппу. Рукъацайсса дахIаву дикIан аьркинссар нитти-буттал школалущал. ОьрчIал дуккаврил ва тарбиялул ялув бацIаву хьхьара хьун ритан къабучIиссар. Ялун нанисса ник тарбия давриву нитти-бутталмур бияла хъунмассар. Гьай-гьай, учительтураягу жаваблувшинна яла къалаглагиссар. Ми дуклаки оьрчIал хьхьичI цалва кьимат къабагьанну къуццу тIун аьркинссар, — ххи бувна Абакар Къюннуевлул.
Цалчинмур суалданийн багьайсса ихтилатраву райондалул ОьрчIащалсса ва жагьилтуращал­сса даврил ва туризмалул отделданул хъунама МахIаммад Гадаевлул кIицI лавгуна 2011 шинал январь зуруй «Лакрал район» МР – данул бакIчинал хIукмулийн бувну цIакь дурсса райондалул агьали ватан ххирану тарбия баврил программалул лагрулуву гьарца шинал дайшиву вай мероприятияртту: Авгъаннава Совет аьрал буккан баврил кьини; Аьпалул Вахта; ватандалухасса балайрдал конкурс «Я люблю тебя, Россия!»; Ватан дуручлачиминнал кьини; Жагьилтурал кьини; тIуркIу «Брейн-ринг».
Бувсуна дусшиврийсса аьрххирду хьушиву Рутуллал ва Ахъушиял районнайсса лакрал шяраваллавун. КIицI лавгуна паччахIлугърал жагьилтурал политика зузи давриву райондалул администрациялул бакIдургьуминнал чулухасса кумаг асар шайшиву.
Конференциялий ялагу ихтилатру бувуна Аьрасатнал МВД-лул Лакрал ва Ккуллал районнал отделданул хъунама Марат МахIмудовлул ва Гъумучиял мизитрал имам МахIаммад Ссаламовлул.
Муния махъ рирщуна Лакрал райондалия Дагъусттаннал жагьилтурал съездрайн гьан бантIиминнал цIарду: АхIмадов Тамерлан, ГьунчIукьатIрал школалул учитель; Закарияев Салим, Гъумучиял цIу лещан дай идаралул зузала; Шихаьлиева ХIуризат, ШавкIуллал школалул учительница; Чалавиева Написат, райондалул субсидияр­ттал отделданул инспектор; Супиев Аьлисултан, Хъурхърал школалул учитель; Гадаев МахIаммад, райондалул администрациялул ОьрчIащалсса ва жагьитуращалсса даврил ва туризмалул отделданул хъунама.