Вай гьантрай дайдирхьунни «Вся Россия – 2013» тIисса XVII журналистътурал фестиваль. Му дур журналистътуран хъуннасса агьамшиву дусса форум. Гьар шинал АьФ-лул Журналистътурал союзрал ЛухIи хьхьирил зуманив батIайссар билаятрал циняв кIанттурдаяту СМИ-рдал вакилтал.

Цила аьдатрайн бувну, фестивальданий гьуртту хъанай бур Дагъусттаннал делегациягу.
Тиккун увкIунни республикалул бакIчи Рамазан АьбдуллатIиповгу.
Официальну фестиваль тIиртIунни сентябрьданул 29-нний Сакиншинначитурал чулуха бавтIми барча бунни Аьрасатнал Журналистътурал союзрал Председатель Всеволод Богдановлул ва Аьрасатнал Федерациялул Президентнал виваллил политикалул управлениялул хъунама Олег Морозовлул.
В. Богдановлул бувсунни фестивальданий дантIисса давурттая, га даврил мурадрая. «Жулва ихтилат бикIантIиссар журналистътурал давурттая, гай давурттал агьалинайн биян буллалисса асардая, ттизаманнул оьрмулуву бугьлагьисса кIанттурдая, жяматравун лавсун нанимуния. Фестивальданий хьунтIиссар лекцияртту, мастер-классру, ккуркки столлу, дискуссияртту. Ми хъинну аьркин­ссар журналистътуран», — увкунни Богдановлул.
Яла журналистътурахь зумаавхъунни ДР-лул Президент Рамазан АьбдуллатIипов. Танал мукъур­ттийн бувну, журналистнал даву хъинну агьамсса ва жаваблувсса дур, цанчирча прессалул информация чIявусса иширттайн хъарну дур.
«Журналистътурал ккуран – га аькьилсса, за кIулсса, чантI увкусса инсантурал ккуранни. Гайннайхчил чIявусса затру бусан шайссар, мура чIумал гайнная цаяватугу чIявусса затру ласун бюхъантIиссар», — увкунни Рамазан АьбдуллатIиповлул. Ганал мукунма бувсунни журналистътурал тIалав дуллалисса мукъул тархъаншиву цила кьаралданийсса дикIан аьркиншиву. «СМИ-рдал гьарца вакилнан дурчIин аьркин­ссар жяматравусса тагьар ва гьарца чичлачисса, тIутIисса мукъул анализгу дуван аьркинссар. Журналист дакI тIайласса икIан аьркинссар», — увкунни Р. АьбдуллатIиповлул.
Республикалул бакIчинал бувсунни Дагъусттаннайсса тагьарданияту, регион хьхьичIунмай хъит учин баврил цIусса модельданиятугу.