КьурбанмахIаммадлул арс Аьшурлаев Зиявуттин
[dropcap]В[/dropcap]ай гьантрай оьрмулул 64 шинаву, захIматсса цIуцIаврища ххассал къавхьуну, дунияллия лавгунни дакI хъинсса, аьмал-хIал бавкьусса зунтталчу, КьурбанмахIаммадлул арс Зиявуттин Аьшурлаев.
[dropcap]З[/dropcap]иявуттин увну ур 1954 шинал ЦIуликъяннал шяраву. ЧIивину унува нитти-буттан кумаг буллай, зий-захIмат буллай аьдат хьуну ур. Бархъаллал шяраву школагу къуртал бувну, лавгун ур аьралуннаву къуллугъ буллан. Зана хьуну махъ зун ивкIун ур МахIачкъалалив сварщикну. Цаппара шиннардива кулпатгу бувну, шяравун зана хьуну, зун ивкIун ур С. Орджоникидзел цIанийсса ЦIуликъяннал колхозрай.
Зиявуттиннул бур ххюва оьрчI, мигу ччаннай бацIан бувну, цала-цала оьрмулул ххуллийн бивчуну бур. Зиявуттин ия аьчухсса, чIивинащалгу, хъунащалгу маз лякъин кIулсса инсан. Шяравусса цинявппагу мажлисру ваналъя бачин байсса. Ци тяхъашиву дикIантIиссар утти ва акъасса хъатIай.
Зиявуттин аьпалул шаврил кьурчIишиву кIидачIлай, жижара буллай буру оьрчIахь, кулпатрахь, цинявппагу гъан-маччанахь. РухI хъинний дишиннав, алжаннул ххари аннав.
Жул аьзиз Зиявуттин
Аьпалухьхьун лавгунни,
Шяраваллил ккурчIагу
Пашманну пахъ багьунни.
ЩихьчIав оьсса къакусса,
ЦучIав пашман къаувсса,
Цинявннангу дус хьусса,
Жул ххира Зиявуттин.
Пиш тIийннасса вил симан
Жун дакIнийна дуссари,
Жул щарнил бусравчув,
Вин алжан нясив баннав.
Бархъаллал
ва ЦIуликъяннал жямат
