[dropcap]М[/dropcap]ажлис тIитIлай, ихтилат бунни ДР-лул Аьрали комиссар Дайтбег Мустапаевлул. Аьрасатнал Президент В. Путиннул барча буллалисса телеграмма дурккуну махъ, ванал бувсунни республикалул аьрали комиссариатрал тарихрая.

---

— Дагъусттаннал областьрал аьрали комиссариат сакин бувну бур 1918 шинал май зурул 2-нний Темир-Хан-Шуралий (Буйнакскалий). Шиву бивкIун бур Къорхъмасов, Дахадаев, Саидов, Хизроев ва м.ц. Областьрал аьра­ли комиссариатрал хъунаману увчIуну ур МахIач Дахадаев. Округрал аьрали комиссариатру бувну бур Порт-Петровскалий (МахIачкъалалив), Дарбантлив ва Темир-Хан-Шуралий.
ЦIанасса чIумал Дагъус­ттаннал аьрали комиссариатру хъанахъи­ссар Аьрасатнал Обороналул министерствалул кIантту-кIанттурдайсса органнуну.

Аьрали комиссариатру сакин бувния шихунмай 100-гу шинал лажиндарай вай органнал яла хъунмур ххазинану хьуссар цала къуллугърал буржру дакI марцIну бартбигьлагьисса лавайсса даражалул пишакартал.
Аьрали комиссариатир­ттал хъуннасса хъар лархъссар граждан ва Буттал кIанттул цIанийсса дяъвирдал чIумал, дяъви къуртал хьуну махъсса захIматсса шиннардий. 1999 шинал Дагъусттаннал аьрщарайн ярагъуннищал­сса террористурал кьюкьри дурхсса чIумал рес­публикалул аьрали комиссариатирттал зузалтрал хъуннасса даву дурссар Аьрасатнал аьралитуращал цачIу талан­сса ополчентурал кьюкьри сакин дан. ХIакьинусса кьинигу яра­гъуннил гужру хьхьичIунмай бан, паччахIлугърал мурадру бартбигьин, ялун нани­сса ник Ватан ххирану тарбия дан, вирттаврал аьпа абад бан жула аьрали комиссариатирттал хъунма­сса хIарачат буллай бур, — увкунни Дайтбег Мустапаевлул.
Республикалул аьрали коми­ссариатирттал зузалт ва ветерантал барча буллалисса ихтилат бунни ДР-лул ХIукуматрал председательнал хъиривчу Рамазан ЖахIпаровлул. Ванал дурккунни Дагъусттаннал БакIчи В. Васильевлул чулухасса барча бавугу.
Хъирив ванал, полковникнал чингу барчагу дурну, Дайтбег Мустапаевлун дуллунни АхIмад-хан-Султаннул цIанийсса медаль.

Дагъусттаннал парламентрал чулуха барча буллалисса ихтилат бунни ДР-лул Халкьуннал Мажлисрал председательнал цалчинма хъиривчу СайгидахIмад АхIмадовлул. Халкьуннал Мажлисрал председательнал цIа ку­сса ссятру дуллунни цаппара шагьрурдал ва районнал аьрали коми­ссариатирттал хъуниминнан ва зузалтран.

Андриана Аьбдуллаева