[dropcap]Г[/dropcap]ьар шинах кунна, гьашинугу гурну хьунни Хъурдаккаврил байран Бархъаллал шяраву. Бархъаллал жяматран ва ляличIинура ххира­сса, буттал буттахъая шихуннай нанисса цанна хасъсса аьдатру дуручлачисса байран дур.

---

Андриана Аьбдуллаева
[dropcap]Щ[/dropcap]ар хъуннасса дуну тIий бухьунссар, шяравалу шанма махIлалийх (саклийх учай бархъаллал) дарчIуну, ца шинах ца махIлалия увчIайсса ур Хъун Хъузала.
Аьдатрайн бувну, га махI­ла­лийсса цинявнначIа тIитIай ссупрарду ва гайми кIивагу махI­лалийминнан урцIив цумур къушлий тIитIинтIиссарив, сияхIру дурну, баян бай гьантлул хьхьичIва. Ккаккан бай­ссар хъамал кьамул банссагу кIива-шанма къуш. Цанма-цанма ккаккан бувсса къушай хъамалу шаврия дайдишай­ссар Хъурдаккаврил байран. ДукьрахIантту, хьхьахьхьартту ва личIи-личIисса дукрарду дирхьусса авадансса ссупра тIивтIуну буссар ХъузалачIагу. Щаллусса кьини га барча ан букIлай буссар щарнил жямат, хъамал. Цуксса авадансса ссупра тIивтIурив, муксса барачатсса, буллугъсса шай­ссар тIар шин.

[dropcap]Г[/dropcap]ьашину хъарас щилай ия хъу-лухччинуха, ятти-гъаттараха зий хъунмасса захIмат бихьлахьисса Ибрагьимов Кьурбан.
Бархъаллал шяраваллия, байрандалул аьдатирттая бавну, ми ккаккан ччай, «Шангереев-тур», «Кубачи-тур», «Дагестан-тур» фирмардал бувцуну бувкIсса биялсса 40-ннийн бивсса туристъталгу бия Бархъарав му кьини. Бусравсса хъамаллуравух бия Москавлияссагу журналистал, «Спартак» футболданул клубрал болельщиктал.

[dropcap]Б[/dropcap]автIцири циняв барча буллалисса ихтилат бувна шяраваллил бакIчи Аьвдулжалил Абакаровлул. Яла цинявппа, Хъун Хъузалагу хьхьичIну, хъарас щун къурув бувккуна. Дуруна дуаьртту. Аьдат­райн бувну, Хъузалайнгу, кувн­нал кувннайнгу диялсса щингу дуртIуна. Чят къавхьусса нажагьссавагу ­акъая.
Яла тяхъа-таза бувксса жямат ва хъамал бувкIуна шяраваллил майданнив, спортрал бяст-ччаллу бан. Бяст-ччаллий лечлай бия мюрщи оьрчIру, жагьилтал, душру, механизатортал ва хъузалт. Ххув хьуминнан дуллай бия кьярчив (бартри). Вайгу бархъаллачIа дикIай ссихьрал къалипрай дурссагу, укунна­ссагу. Хъу-лухччинуха зузиминнан булайссар чуттурду.

[dropcap]Б[/dropcap]архъаллал аьдат­райн бувну, ххув хьуну ссихьу-кьярчи ларсъсса жагьил му буцай душничIан диян дан лагайссар.
Лечаврил бяст-ччалливух гьур­тту хьунни «Спартак» футболданул клубрал болельщикталгу. Лечаврил бяст-ччал къуртал хьуну махъ, щарнил зума-къирагърай ххяххан бувна дучри. Ххув хьуминнан, кьярчив дакъассагу, жяматран хъинну бусравсса шяравучу Расул Кьаландаровлул чулухасса арцуйнусса бахшишругу дуллай бия. Ахирданий, цинявппа шяраваллил майданнив бавтIун, тяхъасса мажлис бувуна.