[dropcap]У[/dropcap]ттигъанну Къизлардал «Концерн КЭМЗ» ОАО-лий дуккан дурсса МАИ-411 самолетрал хIал ккаккан леххан дурну дур. Самолет дуккан дурну дур Москавуллал авиациялул институтрал конструктортуращал хIала-гьурттуну.
ХI. Аьдилов
Цалчин гьавалуву самолетрал дурну дур 11 минутIрал лахъишиврийсса чIун, мунил хIал ккаклай ивкIссар летчик-испытатель Александр Митрофанов. Къизлардал аэропортрай самолетрал хIал ккаккаву бартдигьинтIий дур гьашину июнь зуруй. Яла заявка дулунтIиссар Росавиациялийн, сертификация ласаву мурадрай. Самолет ххалгу диргьуну, сертификация дулаврицIун дархIусса давуртту къуртал хьунтIий дур 2020 шинал дайдихьулий.
Самолет МАИ-411 хъанахъиссар Европанал СS-23-лул ва Американал FAP-23-лул журалийсса. Пишакартурал пикрилий, му багьлул ххира дакъасса самолетрал тIалавшиву дикIантIий дур Аьрасатнавугу, конкуренция духIан бюхъайсса дикIантIий дур дазул кьатIувгу. Самолет зунтIиссар ххира дакъасса ччуччиялий ва харж дуллантIиссар машинартталуксса ччуччия.
