[dropcap]А[/dropcap]прельданул 3-нний Лакрал театрданул залдануву хьунни щалагу Аьрасатнал лагрулийсса хорданул фестивальданул региондалулмур этап.
Бадрижамал Аьлиева
[dropcap]Ф[/dropcap]естивальданул сакиншинначиталну бия ДР-лул Культуралул министерство, Республикалул Халкьуннал творчествалул къатта, щалагу Аьрасатнал хорданул обществалул Дагъусттанналмур отделениялущал цачIуну.
[dropcap]Ф[/dropcap]естивальданувух гьуртту хьунни республикалул районнаясса ва шагьрурдаясса халкьуннал хорду. Миннувух – ЦIуссалакрал райондалиясса «Дараччи» цIанилусса балай учайсса группагу. Миннал усттаршиврун кьимат бишлай бия Аьрасатнал лайкь хьусса артистка, Москавуллал паччахIлугърал музыкалул ва педагогикалул Гнесинхъал цIанийсса Аьрасатнал музыкалул академиялул дарс дихьу Игнатьева Светлана Конопьяновнал каялувшиврулусса хасъсса комиссия.
Конкурсрал хIасиллайн бувну, 1-мур даражалул лауреатъталну хьунни Лаващиял райондалиясса «Лаващи» цIанилусса хор ва Къарабудахккантуллал райондалиясса «Къарабудахккант» цIанилусса хор. КIилчинмур – «Байтерек» цIанилусса Буйнакскаллал райондалиясса хор. Шамилчинмур – «Голос равнины» тIисса цIанилусса Бабаюртуллал райондалиясса хор.
Оьрусналми коллективирттаву цалчинмур даражалул лауреатнал цIанин лайкь хьунни ПаччахIлугърал терскаллал казакнал балайлул ансамбль, кIилчинмур даражалул лауреатнал цIанин тIурча – МахIачкъала шагьрулул 3-мур искусствалул школалул «Забава» цIанилусса хор.
Светлана Игнатьевал цила ихтилатраву яла-яла цIа дунни оьрчIалми коллективирттая.
ДР-лул культуралул министрнал хъиривчу, РДНТ-лул директор Марита МухIадовал кIицI лавгунни Светлана Игнатьевал оьруснал халкьуннал балайрду хорданий щаллу баврил искусство дуруччавриву буллалисса захIмат.
— Жула дур чIярусса аьмсса планну, ва умуд бур ми иширайну щаллу дуван бюхъанссар тIисса. Культуралулли жулва оьрму хьхьичIунмай буллалисса. Укунсса фестиваллал тIурча, кумаг буллалиссар махъа нанисса жагьилтурачIан жула халкьуннал культура, аьдатру диян дуллан, — увкунни Марита МухIадовал.
