Юсуплул арс Юсупов СултанмахIа 

Оьрмулул 78 шинаву аьпалухьхьун лавгунни ххаллил­сса лаккучу, дакI-аьмал уздан­сса, гьарцаннащал хIал бавкьу­сса, хIакьсса захIматчи, дяъвилул арс, ЧIятусса Юсуплул ва Ххадижатлул арс СултанмахIа. СултанмахIа увну ур 1938 шинал ЧIяйннал шяраву колхозниктурал кулпатраву.

Дяъвилул шиннардий хъинну захIмат ккавксса нину ва ппугу ялату лавгун, СултанмахIа ва мунал хъунама уссу Аьвдуллагь багьну бур ЧIяв тIивтIуну бивкIсса детдомрайн. 1954 шинал ЧIявсса детдом Гъумукун бизан бувну, СултанмахIагу увцуну ур гихмур детдомрайн. Гикку дянивмур даражалул школагу къуртал бувну бур. Муния махъ бувккуну бур Буйнакскаллал финансирттал техникум. Зун айивхьуну ур Къизлардал райондалийсса Шяуманнал совхозрай экономистну. Муния махъ зий ивкIун ур ПМК-5 «Главдагестанводстройрал» инженерну. Му даврий зий ванал дурну дур 27 шин, 1995 шинал пенсиялийн укканцIа ур.
Ванан дуллуну дур арцуйнусса бахшишру ва барчаллагьрал чагъарду, хIурматрал грамотартту. Ванал хIалал дурну дур «ЗахIматрал ветеран» тIисса цIагу.
Пенсиялийн увккун махъ СултанмахIал къашай шаний бунни мадарасса хIал. Ванаха хъуннасса аякьа дунни кулпат­рал Маржанатлул ва душваврал, арсурваврал.
Ажалуннин мажал бакъар учай. СултанмахIал бивкIулул кьурчIишиву кIидачIлай, жижара буллай буру кулпатрахь Маржанатлухь, душваврахь Къис­ттаманнухь, Саниятлухь, Эльмирахь, арсурваврахь Юсуплухь, Шамиллухь, буттауссурваврахь Юсуплухь, АхIмадлухь, махъсса цинявппагу гъан-маччанахь.
Цув алжаннул ххари аннав, рухI хъинний дишиннав. Махъминнал оьрмурдай барачат бишиннав.
ЧIяйннал жяматрал цIания АьвдурахIманов ТIалхIат

——————————-

АЬБДУЛЛАЕВА КЯЪВАХАН ХIАЖИЯВЛ ДУШ

Вай уртту-тIутIал лухччив щюлли махмур лаххан буллалисса, гьарзатра утта дуклакисса, цIулаглагисса апрель зурул 19-чинсса кьини лавкьунни дунияллух мякьсса, Лакку билаятрах щабувцсса яру жул тIул-тIабиаьтрал бувччусса, канил дурухху-ххядуккулулгу пагьму бусса хIакьсса лакку душнил, КIямашрал шяраватусса Аьбдуллаева Кяъвахан (Валентина) ХIажиявл душнил.
Кяъвахан бувссар 1963 шинал 20-мур майрай КIямашрал шяраву дяъвилул ветеран Аьли­ев ХIажиявл ва ПатIиматлул (ХIажиявл БатIа) кулпатраву. Байбихьулул классругу буттал шяраву къуртал бувну, 4-мур классрава 10-мур классравун бияннин дуклай бивкIссар ГьунчIукьатIрал дянивмур даражалул школалий.
ХIарачат бусса Кяъвахан дуклан бувххуна дуруххайсса касму-сянат лахьхьин цинна. Лархьхьуну махъ, зий буссия «Дом модраву», мукунма цаймигу дурухху-ххядуккулул организациярдай, совет хIукумат лияннингу, лирну махъгу. Махъ зуманив цилва ателье тIивтIуну, чIахху-чIарахми бучIайссия муничIан. Утти лирчIунни мунил дурурххумур, лавгунни цу­ппа… Лавгунни чIун дуранура, 53 шиннагу къархьуна.
Пасат дурсса цIуцIаврил рахIму къабувунни, бурчу ва ттаркIру дассаннин махъаллил къахъанай цуксса хъин дулларчагу.

Дунияллух мякьсса
жагьил жавгьарду
Мяйжанссарив утти
къатIитIинтIисса,
Инава сайр байсса
КIямашрал лухччив
ЯлугьлантIиссарив
кIукIлу шаттирдах.

Къабивтунна ина ххассал му цIуцIаврил, къабивтунна ххари хьун арсная, душния, арснал кIива мюрщисса, янил жавгьарду кунмасса, оьрчIал оьрчIая. Къабивтунна Альбинал хъатIул тяхъа-шад буван.
Гьарзатраву хIаласса, дакI хъинсса, чIахху-чIарахминнащал хIал бавкьусса хъамитайпа бия Кяъвахан. Валентина тIисса цIа дирзун диркIссар ванин 1963 шинал космосравун левхсса космонавт душнил цIа духьувкун. Бусурман диндалухун дагьсса буттал ниттил ци цIарича, хIакьинуния тинмай ва Кяъваханни куну, каабалун хас дурсса жулла лакку цIа дирзссар. Цими цIа дизарчагу, ци диндалул цIа дизарчагу, ина оьрму кутIасса бивкIун бура ххирай, жул Кяъвахан! Вин алжан тIитIиннав, гьав нурданул дуцIиннав. Жуяту буцарчагу, Занная, гьаттая буцан къабаннав.
КьурчIишивугу кIидачIлай, жижара буллай буру ни­ттихь Па­тIиматлухь, ласнахь МахIам­мадлухь, арснахь Аьлихь, душ­нихь Альбинахь, уссихь Ма­хIам­мадханнахь, ссихь Па­тIиматлухь (Паша), ласнауссихь Аминнухь, щалвагу Ханнахъал ва Аминхъал тухумрахь. Махънал оьр­мурдай барачат бишиннав, ванихлугу вайми щалиххан битаннав.
Алжаннул багъирдавух
Сайр буллалу Кяъвахан,
Къабивтуннача Заннал
Буттал аьрщарайх сайр бан.

КIямашрал, ГьунчIукьатIрал жямат

——————————————

Хъуннасса кьурчIишиву кIидачIлай, жижара буллай буру жулва одноклассница
Аьбдуллаева (Аьлиева) Кяъвахан ХIажиявл душ,
чIун дакъасса бивкIулул жуятува личIи бувну, аьпалувух бишаврийн бувну ванил ниттихь, ласнахь, арснахь, душнихь, уссу-ссихь, цинявппагу гъан-маччанахь, щалва агьлу-авладрахь.
Кяъваханнун къабуллумур оьрмулул бутIа муния бивзминнан ххи бувну лякъиннав. Цуппагу алжаннул ххари баннав, гьаттай нур дизаннав. Амин!
АрхIал дуклай бивкIми