Апрельданул 14-нний 12 ссятраву «Первый», «Ро­ссия-1» «Россия-24» телеканаллал эфирдануву, «Маяк», «Вести ФМ» ва «Радио России» радиостанциярдавух дайдирхьунни «Прямая линия с Владимиром Путиным» программа ккаккан дуллай.

ТIайланмасса эфир бачин бувну бия В. Кораблева ва Е. Рожков.
Е. Рожковлул бувсъсса ку­ццуй, студиялувун оьвкуну бия хIакинтурайн, учительтурайн, зузалтрайн, бизнесчитурайн, аграрийтурайн, студентътурайн, аьлимтурайн ва чIявусса цайминнайнгу.
В. Кораблевал бувсунни инсантурал къайгъурду бушиву агьалинал оьрмулул даража, маэшат ялавай багьаврил, къа­ххуйсса ххуллурдал, ЖКХ-лул иширттал, медициналул проблемарттал ва цайминнулгу.
Цалчинмур суал буллунни Омскаллал областьраятусса Екатеринал. Ганил бувсунни ОМСК шагьрулул дязаннивсса ххуллурдаву къувирду хьуну душиву, машинарттай занан къахъанай бушиву. Метро буллай бачIину кьабивтун бушиву.
В. Путин: Катя, проблема буниялагу захIматсса бур. Утти­гъанну жу сакин бувну бу­ссия ххуллурдал фондру, тиккун тIайла дурккун дуссия таман­сса луртанну. Амма махъсса ппурттуву чIявусса суаллу бур ххуллурдал хIакъираву, инсантурал буруккинтту чIалай бур тIайласса бушиву ца Омскаллал областьрай бакъасса цайми регионнайгу.
Мунийн бувну жу ХIукумат­ращал цачIу ххал банну ци бан бурив, цинияргу хьхьичI ххуллурдал фондру гьарза бан аьркинни. Миккун дичлачисса арцугу аьркинссар, тили-хъили къадурну, так цила мурадрай ишла дуллан.
Москавлиясса Людмила Саф­роновал суал бур укунсса: «ДукIу на дукия ласайссия щалва кулпатран, нюжмардий харж дайссия 5 азарда къуруш. Утти, шин ларгун махъ, яни цIанасса ппурттуву харж шай 10 азарда къуруш, яни кIилий ххишала. Амма хIукумат дур инфляция так 12,5 процентрал хьуссар ца шинай тIий. Щийнни утти вих хьунтIисса, ХIукуматрайн ягу ттучандалувасса чеклийн?»
В. Путин: Чеклийнгу, ХIу­куматрайнгу, учинна циваннивгу. ХIукуматрал бусласиссар шинай дянивну ларсъсса инфляциялия, амма му хьуну дур 12,5%-рал дакъача, 12,9%-рал. ДукIу, хаснува шинал дайдихьулий, дукиялухсса багьри таман­сса гьаз хьуна сайки 14 процентрал, амма шамилчинмур кварталданий багьри тамансса ялавай багьуна. Гьашинусса шинал дайдихьулий дукиялухсса багьри ххи хьунни сайки 2,2 процентрал. Мунияту хIукуматрал жува хъяврин къабуллалиссару, му мукунни буниялагу. 12,9 процент – ми чансса бакъар.
(Гихунмайгу буссар)
ХIасан Аьдилов