Вай гьантрай Дагъусттаннайн бувкIунни «Защитники Отечества» тIисса паччахIлугърал фондрал вакилтал, регионнащал­сса даврил управлениялул каялувчи, Аьрасатнал Виричу Андрей Ковтуннул нину Мария Костюк ва департаментрал хъунама Сергей Бычков.
Вай хьунабавкьунни МахIачкъа­лаллал мэр Юсуп Умавовлущал. Шикку гьаз бунни СВО-лий талатиминнал кулпатирттахсса къулагъасрал хIакъиравусса масъалартту. Хъамал бивунни МахIачкъалаллал № 54 школалийнгу, Дагъусттаннайн ххявхсса къачагътал ххит бувну 25 шин шаврин хасну дуллали­са мероприятиялий гьуртту хьун. Вайннащал архIал бия кIицI лавгсса фондрал Дагъусттаннал филиалданул хъунама МахIаммад Рашидов, Аьрасатнал Виричу Загьид Загьидов, Чувшиврул орден ларсъсса генерал-майор Муслим Даххаев, 1999 шинал Липецкаллал ОМОН-далул командирну ивкIсса Сергей Сковородин.
Школалул директор, Аьрасатнал Виричу НурмахIаммад ХIажимахIаммадовлул нину Сапижат Мазаевал хъамаллуран ккаккан дурна Ватандалул мурадру буручлай жанну кьурван дурсса вирттавран хас дурсса экспозиция. Мария Костюклул, оьрчIру барча буллай, увкуна: «Зун тIайлабацIу хьуссар укун ххуйсса, жулва билаятрал тарихрал хIурмат бюхттулсса школалий дуклан, хIакьсса вирттавращал кIул хьун», – куну.
Ванил кIицI лавгуна цуппа хIайранну бушиву ва школалий тарбиялул даву, сантирайн руртун, ххуйсса даражалийн гьаз дурну душиврий, дуклаки оьрчIащал хьунабакьин школалийн Вирттаврайн оьвчайшиврий. Ххуйсса кьимат бивщуна ванил «Защитники Отечества» фондрал Дагъусттаннаймур филиалданул даврингу.
ПатIимат Рамазанова