Сентябрьданул 3-нний, щалагу Аьрасатнаву кунна, Лакрал райондалийгу кIицI ларгунни терроризмалийн къарщисса кьини. Мунин хас дурсса митинг хьунни Аьрасатнал МВД-лул «Лакский» МО-лул къатрал хIаятраву. Ваний гьуртту хьунни райондалул администрациялул зузалт, низам дуруччай органнал зузалт, Гъумучиял школалул дуклаки оьрчIру.
Митинг дайдирхьунни къуллугърал бурж биттур буллай, жаннацIа хьусса полициялул зузалтран дацIан дурсса гьайкалдануцI тIутIив дишаврия.
Райондалул депутатътурал мажлисрал хъунама Явсупи ХIамзаевлул кIицI лавгунни ва кьини тарихраву лирчIун душиву 2004 шинал Бесланнал школалий хьусса, дунияллий яла оьхIалмур терактран ккаллисса оьзрулийну. Бувсунни хIакьинугу Запад цачIун хьуну бушиву Аьрасатнал агьали гьулусан бан, жагьилсса никирай жунна ятсса идеология ялув духIлахIисса гужру вив бакьлай бушиврия. Вай иширттайн жущава данди бацIан бюхъантIиссар, увкунни, так жула тарихрая, магьирлугърая цIакьсса кIулшивугу дуну, куннал кув бувгьуну, личIлулну ялапар хъанай бухьурча.
МВД-лул инспектор АхIмад Аллаевлул дакIнин бивчунни къуллугърал бурж биттур буллай, оьрмурдацIа хьусса полициялул зузалт, бувсунни агьалинал оьрмурдал мюхчаншиврул ялув полициялул зузалт гьарца кьини цала жанная ка ларсун зий бушиву.
БавтIминнал ца минутрайсса пахъ багьну дакIнин бивчунни личIи-личIисса терактирдаву оьрмурдацIа хьуми. Дуклаки оьрчIал дурккунни терактирдаву ливтIуминнан хас дурсса ва дакьаврийн оьвтIутIисса назмурду.