Терроризмалийн къарщисса кьини Ккуллал райондалийгу дунни тамансса мероприятияртту.

Ваччав Вирттаврал аллеялий дунни митинг. Ва митинг тIитIлай, райондалул бакIчинал хъиривчу Анатолий Давдиевлул кIицI лавгунни уттизаманнул ца яла къювумур масъала бушиву терроризмалуцIун бавхIумур ва чIявусса миллатру ва динну дусса Аьрасатнаву, ми личIи къадуллай, бавкьуну яхъанахъаву душиву паракьатсса оьрмулул чарабакъашиву. Бувсунни терроризмалул ва экстремизмалул идеологиялийн къарщисса давуртту райондалий чан хьун къаритайшиву.

«Бесланнай 2004 шинал сентябрьданий хьусса мусиватсса иширттал чIалачIи дунни мюрщисса, цичIав тахсир бакъасса оьрчIайвагу рахIму бакъасса, терроризмалул оьхIалсса сичча. Шанма гьантлий школалул лагма рургьуну, зулму бунни зулмукартурал кIулшивурттал хъирив школалийн байрандалийн бавтIцириннай. Та баласса кьини 330 инсан оьрмулуцIа хьуссар, тайннавугу чIявуми оьрчIру. Ва лялиян буван захIматсса, цукунчIав хъамагу къабитантIисса ишри. Билаят лиян ччиминнал мурдалсса тIуллугу, пикрирдугу ссайнчIав къабуккантIиссар, жува куннал кув бувгьуну, цIакьну буссаксса», – увкунни ванал.
Вава мяъна-мурадрайсса махъру лавхъунни райондалул АТК-лул аппаратрал хъунама пишакар МахIаммад Рамазановлул, Ухссавнил Ккавкказнавусса аьралий иширттал ветеран Щамхал Хизриевлул ва цаймигу инсантурал, культуралул ва школардал вакилтурал.

Ваччиял школалул дуклаки оьрчIал бувккунни терактирдахьхьун биривминнан хас бувсса ва низам дуруччай органнал зузалтрал чувшиврун лахъсса кьимат бишлашисса шеърирду.
ОьрчIал дакьаврил, хъиншиврул тема аьч дуллалисса суратругу дирхьунни асфальтрай.
Райондалул культуралул управлениялул хъунмур Марина Ибрагьимовал бувсунни, укуннасса мероприятияртту хьушиву Ккулув, ЧIяв, Вихьлив, КIилчинмур ЦIувкIрав, Хъювхъав ва ЦIущаннивгу, вай мероприятиярттай культуралул зузалтрацIун чялишну оьрчIругу гьуртту хьушиву.
«Цинявннан бувчIлай бур хIакьину терроризм щалагу дунияллий хъуни-хъунисса зараллу инсантуран биян буллалисса бала бушиву. Мунияту, терроризмалийн къарщи бацIаврил масъала ца яла цIюрувкьумур бур. Райондалул магьирлугърал зузалтрал гьар шинах терроризмалийн культуралийну къарщи бавцIушиву ккаккан буллалисса мероприятияртту дувайссар», – увкунни ванил.

ПатIимат Рамазанова