Сентябрьданул 7-нний дайдирхьуссар Дагъусттаннай Дунияллул халкьуннал дянивсса литературалул фестиваль. ЧIявучин ХIамзатовлул фестиваль ва «КIяла кьурукьирттал байран» тIий кIулсса.

Шанма гьантлийсса ва фестиваль республикалул ца яла ябацIанмур байрангур, культуралул хъусгур. Гьашинумур цурдагу 40-чинссар, юбилейрал фестивальли. МукьцIалчинсса фестивальданий гьуртту хьунтIиссар 40 региондалиясса ва билаятир­ттаясса хъамал.

Ларгсса нюжмардий журналистътуращалсса хьунабакьаврий «Дагъусттан» РИА-лий культуралул министр (врио) Зарема Буттаевал ва Дагъусттаннал Чичултрал союзрал председатель Марина АхIмадова-Колюбакинал бувсунни даву лайкьсса даражалий дуваншиврул цукунсса мероприятияртту хIадур дурссарив.

Зарема Буттаевал бувсуна, сентябрьданул 14-нний байраннал программалуву душиву Дагъусттаннал Халкьуннал цашиврул кьинилун хас дурсса мероприятиярттугу. Ва кьини МахIачкъалаллал Хъунмайданнивгу Аьрасатнал творчествалул коллективрдал концерт ккаккан дувантIиссар, хъирив кьини тIурчарив – билаятрал ва Дагъусттаннал артистъталгу, коллективрдугу гьурттусса концерт. КIицI лавгунни ванил машгьурсса «Лезгинка» ансамбль дакъагу, тамашачитурал хьхьичIун дуккантIишиву Н.С. Надеждинал цIанийсса «Березка», «Донбасс» ва Хакасиянал къавтIаврил ансамбльлугу.

Му бакъассагу, сентябрьданул 8-нния 15-ннийн Яру­ссаннал театрданул хьхьичIсса майданнив Сулайман Стальскийл цIанийсса бульварданий дикIантIий дур халкьуннал канил пагьмурдал ярмарка, пагьламантурал байран «Пагьламан» ва цаймигу мероприятияртту.
Марина АхIмадовал - ­Колюбакинал бувсуна «В поисках Расула» тIисса документал киносуратрал презентациягу дикIантIишиву, Дагъусттаннал вузирдал студентътуращалсса хьунабакьавурттугу. Бувсунни якутнал мазрайн таржума був­сса Расул ХIамзатовлул луттирал презентациягу дикIантIишиву.
«Якутиянава хъунмасса делегация бучIантIий бур, мунил каялувчинугу Якутиянал Чичултрал председатель, халкьуннал шаэр Наталья Харлампьева бур. Вайннащал уртакьсса цаппара проектругу дур жул. Мукунма Аьрасатнал цайми регионнаясса таржумачитал бакъа, бучIантIиссар кьатIаллил билаятирттаяссагу. Палестиннавасса, Беларусьнавасса, Къиргъизнавасса хъамалгу. Дагъусттаннал культуралийгу тамаша бувну, цаламургу ккаккан дувантIиссар.
ЧIявусса мазурдий­сса ихтилатругу, шеърирдугу экьинантIиссар вай гьантрай Дагъусттаннай», – увкунни ванил.
Муданма кунма, поэзиялул вечерду, литературалул цаймигу мажлисру хьунтIиссар шаэрнал буттал миналийгу, хъамал биянтIиссар Хунзахъун, Гъунив, Дарбантлив, Каспийскалийн. Ванил кIицI лавгуна гьар шинал Культуралул министерствалул кабакьайшиву фестиваль дуллалийни, гьашину Аьрасатнал Чичултрал союзралгу кумаг бувшиву. Бувсуна Дагъусттаннал цаппара чичултран гьашину Аьрасатнал Чичултрал союзрал стипендиярттугу буллантIишиву, вайннавух лакралми чичултгу бушиву.
ПатIимат Рамазанова