Декабрьданул 19-нний Москавуллал Гостиный Двордануву хьунни Аьрасатнал президент Владимир Путиннущалсса тIайланнасса линия – «Владимир Путиннущалсса шинал хIасиллу» тIисса программа. Ларгсса шинал кунна, «ТIайланнасса линиялущал» хьунни паччахIлугърал бакIчинащалсса хъунмасса пресс-конференция. Ваний гьуртту хьу­н­ни Дагъусттаннал журналистъталгу.

ТIайланнасса линия кка­ккан бюхълай бия федерал каналлай: «Первый», «Россия 1», «Россия 24», «НТВ», «ОТР», «МИР». Трансляция най дия мукунна «Маяк», «Вести ФМ» ва «Радио Россия» радиостанциярдай.
Мероприятиялий гьуртту хьунни Аьрасатнал федерал ва регионнал СМИ, чил билаятирттал журналистътал. СияхIрайн лавсун бур мукунма къадусъсса билаятирттал журналистъталгу, АьФ-лул президентнал пресс-секретарь Дмитрий Песковлул бусаврийну, ми чансса бур.
Декабрьданул 8-нния шинмай программалул Колл-центрданул кьамул дурну дур 2,5 млн лабизаву.
Колл-центрданийн лабизаву гьан дурсса яла чIивиманан дур дурагу 8 шин. ПаччахIлугърал бакIчинащалсса тIайланнасса линиялийн лабивзун бур хъунмурчIин 35 шинавату лавайсса оьрмулул инсантал.
Кремлилул вакилнал ккаккиярттайн бувну, аьрасатлувтурал хъунмур буруккин бур хасъсса аьралий операциялуцIун бахIусса, мукунма цIуллушиву дуруччаврил, транспортрал инфраструктуралул, экономикалул лябуккулул масъаларттацIунсса. Ванал тIимунийну, ми циняв масъалар­тту тIайла буккан тIий бур профил министерстварттайн.
Песковлул тIимунийну, журналистътурая бучIайсса бур хъун­мурчIин дунияллул халкьуннал дянивсса иширттайн багьай­сса суаллу.
ТIайланнасса линиялийн бувкI­сса суаллахьхьун дуллусса жавабирттал хIакъираву жу гьартану бусанну хъиривмур номерданий.

ХI Аьдилов