Декабрьданул 16-нний Москавлив Дагъусттаннал бакIчи Сергей Меликов хьунаавкьунни СВО-лул Аьрасатнал Виричу МахIаммад Исбакиевлул ниттищал Маринащал, щащар Аннащал ва 5 шинавусса душнищал.
ЦIушинал байран ялун нанисса вай гьантрай Меликовлул Виричунал душ Мишель ххуйсса бахшиширттайну ххари бунни, ванийн оьвкунни буттал ватандалийн биян. Меликовлул барчаллагь увкунни аьралий гьалмахчунал гьунарданун лайкьсса кьимат бища тIисса тавакъюрай Аьрасатнал президентнайн бувксса МахIаммадлул гьалмахтурайн. Шиккува тикрал буванну, Аьрасатнал президентнал МахIаммадлул чувшиврун лайкьсса кьимат бищунсса махъ буллуну бивкIшиву ва, му махъ бацIан бувну, Вирттаврал кьини Кремлилуву МахIаммадлул ниттихьхьун ва щащарнихьхьун Мусил ЦIуку буллушиву.
– На ххарину ура Кремлилуву награда дулаврихлу. Жула ватанлувнан укун бюхттулсса даражалийсса кьимат бищаву агьамсса ишри, – увкунни Меликовлул.
Ва хьунабакьаврий гьаз бунни МахIаммад дуклай ивкIсса Новосибирскалийгу, ванал буттал ватандалий Щаржаврайгу Виричунал аьпа уттава буллалисса мемориаллу дуваврил масъалагу.
На Марина Исбакиевахь цIувххуссия, ва ЧукIнатусса бухьувкун, ниттилмур ватандалийгу ула дацIан дувансса пикригу буссарив куну. Ванил бувсунни ЧукIнавгу дувансса пикри бушиву, Лакрал райондалул хъунаманал, шяраваллил хъунаманал цийнма оьвкушиву, балжину ххал бигьинтIишиву му масъалагу. Бувсунни Дагъусттаннал бакIчинащалсса хьунабакьаву, муданна кунна, гъилисса, хIурматрайсса хьушиву.
КIицI лаганну, ва Дагъусттаннал бакIчинал Виричунал ниттищалсса 3-чинсса хьунабакьаву хьушивугу.
ПатIимат Рамазанова
