Халкьуннал цашиврул кьини кIицI лаглагисса мероприятиярттал лагрулий Дагъусттаннал Росгвардиялул зузалт ва аьралитал гьуртту хьунни «Я – россиянин» тIисса республикалул патриот акциялуву.

Мероприятие сакин дурну дия «Волонтеры Победы» тIисса щалагу Аьрасатнал жяматийсса суккушиннарал кIанттул отделениялул. Акциялул лагрулий волонтертурал бавчIунни Росгвардиялул зузалтрайх лентарду-триколорду, бувсунни байрандалул тарихрая.
«Халкьуннал цашиврул кьини – ва паччахIлугърал ца яла агьаммур, Аьрасатнал халкьуннал цашиву ва цачIушиву ккаккан дуллалисса байран хъанахъиссар. Байран кIицI лагаврийну жува ккаккан буллалиссару паччахIлугърал лавгмуничIансса, цIанихсса жула тарихрачIансса хIурмат. Мукунма ва кьинилул дакIнин бутлатиссар жула билаятрайсса циняв халкьуннал дянивсса дусшиву, Ватандалухсса ччаву ядан аьркиншиву», – увкунни Росгвардиялул управлениялул хIаписар, капитан Расим Эсрефовлул.
Андриана Аьбдуллаева