Жяматрал аькьлу-кIулшилуву хIа­киннал сипат хIасул дуллай дур цIусса хавардал ленталул ва кинордал. Гиву жува вардиш хьуну буру ккаклай чIярусса ссятирдай операция буллалисса хирургтал ягу инсан бивкIулуща ххассал уллалисса реаниматологтал. Амма хIакьсса гьарца кьинисса медицина дайдихьлай дур, операциялул ягу интенсив терапиялул палаталуву дакъача, участковый терапевтнал кабинетрал нузкьунттух. 

ЦIуллу-сагъшиву дуруччаврил системалул цалчинсса шачIану тIурча, байбихьлай бур участковый хIакинная. Му хъанай дур цIуллу-сагъшиву дуруччаврил яла вихшаласса къинтта. Гьамин, ваначIан ур къашайшала цала азар кIул даннин хьхьичIа-хьхьичI укIлай. МРТ-лул ва эндоскопрал канилусса хасъсса пишакартураннияр участковый терапевтнан багьайхьунссар «хьулухара» цалчинсса диагноз дишин, къашайшалал мукъурттийн бувну, сипатрал рангирал, ссихI бигьаврил, чурххал бущилул, яруннивусса цIайлух урувгун. Гьамин, ганалли къашайшалан хасъсса пишакарначIансса нуз тIитIайсса. Аьрасатнал ОМС-рал системалуву кардиологначIан, гастроэнтерологначIан ва эндокринологначIан ганалли тIайла уккайсса. Му бакъассагу, участковыйнан дакIних кIулссар гьарца къашайшала ва ганал цIуцIаву. Ганан аьркиншиву дакъассар, масалдаран, махъсса ацIра шинал мутталий гипертониялул къашайшалал цIуцIаву цIуницIа лахьлансса.

Участковый ккалли ай оьрму лахъишиврул архитекторнан. Гьамин, ганалли чичайсса гьанусса даруртту, лахьхьин буллай уссар къашайшалан цала оьттувусса качарданул ялув ацIан, чIумуй тIайла уккайссар диспансеризациялийн. Ца кьини участковыйнал кабинетравух уккайссар зувия-мукьцIала къашайшала, вас-ццахлий, щак-щуклий ва вихшала кьуркьуну.
МахIачкъала шагьрулул цIу­ллу-сагъшиву дуруччаврил идарарттал участковый хIакинтураву хьхьичIххуттай дур Шуниннал шяраватусса ХIажинал душ Оьмарова Аьйшатлул цIа. Гьашину ванил оьр­мулун бартларгунни 75 шин. МукьцIаллунниха лирчусса шиннардил манзилданий медициналуву бивтсса ххуллул бачIи лавгун бур Дагъусттаннал Гериатриялул центрданул участковый хIакинну зий. Шиккун ва бувкIун бур 2007 шинал Портрал азарханалия.

Бувну бур Аьйшат Шуниннал шяраву. Ванил ппу ХIажи хьуну ур Маччайннал махIлалий кIулшиву дулаврил гьану бивзсса учительтуравасса ца. Ва ивкIун ур Хъунайннал шяраву школа тIитIаврил бакIщаращуй. Цува занай ивкIун ур школа бансса стройматериаллал хъирив. Тамансса шинну директорну зий дурну махъ зий ивкIун ур колхозрал председательну. Байбихьулул школа буттал шяраву, урчIва класс марцIсса ххювардай Хъунайннал школалий къуртал бувну, Аьйшат экзаменну къадуллунма дуклан бувххун бур МахIачкъалаллал медучилищалувун. Ва шинал вайннал щала кулпатгу шярава шагьрулийн бивзун бур.
ЯтIул дипломрай училищагу къуртал бувну, кIира шин оьрчIал азарханалий зийгу дурну, 1977 шинал дуклан бувххун бур Мединститутравун. Училищалувугу, институтравугу ванил цIакьсса дусшиву диркIун дур лакрал цIанихсса ккарччал хIакиншиврий кIулну бивкIсса, архIала цил цIа балайчишиврийгу машгьурну бивкIсса Эльза Рамазановащал. ДакIнин бутлай бур цуппа ганил хъатIуй чIаравдушну, ТIюхчарав жалин биян бан лавгун бивкIсса.

Мединститутгу ятIул дипломрай къуртал бувну, МахIач­къалаллал Цалчинмур азарханалий интернатура къуртал бувну,1984 шинал зий байбивхьуну бур Портрал азарханалий. Хъунама хIакинну зий ивкIун ур Гъумучатусса Аьбдулла Кьурбанович. Азарханалий хъин хъанай бивкIун бур Хьхьирил портрал, Жамирду бакьин бай заводрал, РСУ-лул зузалт.
«Аьбдулла Кьурбанович республикалий бусравсса хIакин ия, зузалтрал кьимат бусса ххаллилсса каялувчи ва даврил сант кIулсса сакиншинначи ия. Ца кулпат кунмасса коллектив цачIун бувна.

Ашттарханная ччя-ччяни комиссия бучIайва, азарханалул даву ххуйчулий ккаккайва», – буслай бур Аьйшат.
Дагъусттаннал Гериатриялул центрданий ванил участокрай усса ур кIиазара инсан. КIицI лаглай бур бугьарасса инсантурай ковидрая махъ ялун ххи хьуну душиву цIуцIавуртту: диабет, оьттул туннурдал цIуцIаву, гипертония, инфаркт, инсульт.
Ковидрал пандемиялул чIумал асар хьунсса иширая цIувххукун, дакIнин бутлай бур цила участокрай цIуцIаврил цучIав зекъавххушиву. Амма цила ниттиуссу Шихамир МахIаммадович, ХIажиная махъ Хъунайннал школалий директорну зий ивкIсса ва ванал кулпат Вилттащатусса Къистаман госпитальданий цаннал хъирив ца аьпалухьхьун лавгсса, жула Киров ва Гулизар Султановхъул кунма. .

«Хъуннасса эшкьи-ччаву дуну цаннан ца нясив бувсса, эшкьи-ччаврий щала оьрмугу бувтун, ца акъасса дунияллий вамагу къаикIан, кIиягу жуятува батIул хьуна. Шихамирдул даин угу-учайва, цивппа ца кьини гьантIиссару дунияллия куну. Яргсса, илданул итталусса лас-щар буссия. Гайннал бивкIу хъинну бювххуна. Мукунма бювххуна ттущалва Портрал азарханалий зий бивкIсса Хъусращиял шяраватусса Пайнусатлул бивкIугу», – буслай бур Аьйшат.
Аьйшатлул душ Шяраваллил хозяйствалул институтрал экономический факультетгу къуртал бувну, зий бивкIун бур портрай экономистну. ЦIана оьрчIащал шаппа бур. Арс зий ур муххал ххуллул идаралий.
Шуниннал шяравалу ца-кIия инсан акъа ялапар къахъанай дачIра хьуну духьурчагу, гъинттул бигьалаган лага-бучIайми чан бакъасса бур. Лагайсса бур Аьйшатгу гъанчунащал буттал шяраву бигьалаган.

Лариса Кудаева (ш. Читтур) Чариновлул кIичIираву 55-мур къатраву ялапар хъанахъиминнал цIания:
– ХIакин – му, анжагъ, пиша бакъар, му – кьадарди. Жун, Чариновлул кIичIираву 55-мур чIярузивурду дусса къатлуву ялапар хъанахъисса инсантуран, хъунмасса тIайлабацIу хьуссар. Жул чIаххуврай ялапар хъанай бур караматсса инсан, ххаллилсса хIакин Аьйшат ХIажиевна.
Ттигъанну Аьйшат ХIажиев­нал дуссия юбилей. Ва иширацIун бавхIуну, дакIнийхтуну барчаллагьрай буру цинявппагу чIаххуврал ва къашайшалтрал цIания. Аьйшат ХIажиевна илданул дянив бусравшиврул цIанин лайкь хьусса хIакинни. Жун чIявуссалийла багьай хьхьуниву ванийн оьвчин, къашайшалан кумаг, маслихIат аьркин багьтари. ТачIав махъаллил къашай. Даврил опыт, пишалийн дакI тIайлашиврул хасиятирттал ялун ва бур дакI хъинсса, аьчухсса инсан. Цила дакI цIуцIаврийну ва хъинсса мукъуйну ванища бюхъай къашайшала вихшала дишин ан, къюву рахIат дан.

Умарова Сувужат, чIаххув­щар:
– Аьйшат ХIажиевна бур дакI хъинсса, къашайшалтрай дакI цIуцIисса, цийрасса жаваблувшинна кIулсса, пишалийн дакI тIайласса хIакин. Хьхьунил лякьлувугу, цIан-чаннавугу, тачIав инкар къабувну, къашайшалал ялун левчунма бучIай. Аллагьнал ванин дуллуну дур халкьуннах дазу-зума дакъасса ччаврил дурцIусса дакI. Ванил халкьуннан буллалисса гьарцагу хъинбала цил оьрчIан, ужагъран талихI-тирххандарайну зана бикIаннав!

Зулайхат Тахакьаева