ДР-лул Халкьуннал Мажлисрал председатель Заур Аскандаров хьунаавкьунни, И.И. Ханбалаевлул цIанийсса Республикалул дуккаврил центр къуртал бувну, республикалул тарихраву цалчин ЕГЭ-лий 300 балл лавсъсса Гюлмира Халифатоващал. Ванил оьрус мазрайгу, профил математикалийгу, физикалийгу лавсун бур ттурш- ттуршва балл.

Хьунабакьаврийн оьвкуну бия мукунма Гюлмирал учительтурайн ва Республикалул ду­ккаврил центрданул директор Анжела Байрамбековнайн.
Хьунабакьаврий парламентрал спикернахь Гюлмирал бувсунни дуклан буххансса пикри бушиву Москавуллал паччахIлугърал технический университетравун «Программирование» сянатрай.

Заур Аскандаровлул бувсунни пагьму-гьунар бусса жагьилтурацIун кабакьаву региондалий ца агьаммур даврин ккаллину душиву.
«Вил хIасиллу – му хъунма­сса захIматри ва вила мурадирайн биянсса хIарачатри. Мукунсса хIарачат бусса оьрчIан шайссаксса ка-кумаг буллан аьркинссар. Микку хъунмасса кIану бугьлагьиссар учительтурал ва насихIатчитурал. Жу зуяту пахрулий буссару», – увкунни Заур Аскандаровлул.

Анжела Байрамбековал Заур Аскандаровлухь барчаллагь увкунни дуккаврил масъаларттах къулагъас дуллалаврихлу ва педагогтурал иширттацIун кабакьлакьаврихлу.

Хьунабакьаврий дуллунни наградарттугу. РЦО-лул директорнан ва учительтуран буллунни ДР-лул Халкьуннал Мажлисрал председательнал чулухасса Барчаллагьрал чагъарду.
Гюлмира Халифатован Заур Аскандаровлул дуллунни цIа чирчусса ссят, Барчаллагьрал чагъар ва планшет.