Щукиннул бавтIунни хъунисриннал мажлис
Июньдалул 13-нний хьунни Дагъусттаннал Хъунисриннал советрал батIаву.
Муний Советрал председатель Ибрагьим Ибрагьимовлул республикалул бакIчинал чIумуйнусса кIанайма Федор Щукиннухь бувсунни дурсса давурттал хIасиллая ва дан-дитанмуния.
Советрал агьаммур масъалану хъанахъиссар жяматийсса ва политикийсса масъалартту ххал бигьаву, жяматийсса сакиншиннардащал ва властирдащал хIала-гьурттуну зузаву. ДахIаву дурну дур районнал ва шагьрурдал кIанттул советирттащал.
Ларгсса шинал цалчин хьуссар Хъунисриннал советрал съезд, Ухссавнил Ккакказуллал ва Къиримнал цIусса территориярттал вакилталгу гьурттуну. Хъиривмур съезд хьунтIий дур ссуттил.
Советравун бувххун бур хьхьичIвасса муниципалитетирттал бакIчитал, министртал, аьлимтал, халкьуннал артистътал ва чичулт – Дагъусттаннал циняв миллатирттал вакилтал.
ХI. Аьдилов