Гьашину МахIачкъалаливсса ва Каспийскаливсса Цалчинмур ЦIувкIуллал жагьилтурал, ххуйну бигьалагаврицIун, лахъину дакIний личIансса куццуй гъи тIайла дуккансса хIарачат буллай бур.

Гъидайдихьулийва шярава­ллил активистътурал хIукму бувна, гьарца бигьалагай кьини ссят 6-нний кIюрххила, оьрчIругу бувцуну, МахIачкъалаллал пляжрайн буккаван.

Хъиндайдихьу дурна шяраваллил спортсментуращалсса зарядкарттая. Активист Аьбдуллагь МахIаммадовлул жяматрал вотсап-группалувун нитти-буттахъахь, ттатта-бавахъахь оьрчIру кIюрххил хьхьирийн гьан буллалияра тIисса тавакъю бувна. КIицI лавгуна, шяраваллил жагьилтал ва оьрчIру ку­ннащал кув кIул хьунсса сантгу душиву, спортрахун машхул хьуну, цIуллу-цIакьшиврул ялув бацIаву дувансса хIалугу дагьлай душиву.

Дайдихьу дурна грэпплинграл журалуву мукьийла дунияллул чемпион хьусса МахIаммад ХIажиевлущалсса хьунабакьаврия. Яла гихунмай гьарца нюжмардий ца-ца спортменнащалсса хьунабакьавуртту дунни. Мяйжаннугу, чIявусса жагьилтал ва оьрчIру буккай хьхьирил пляжрайн республикалул кьатIув яхъанахъисса, отпускирдай Ватандалийн бувкIссагу.
ЦIувкIуллал жагьилтурал ва оьрчIал хьунабакьавуртту так хьхьирий дуваврий гьашиву къадурну, цайми давурттугу дуллай бур. Масалдаран, нюжмардий цал велосипедирттай, шагьрулул къирагърая байбивхьуну, гьавалий лагма буккаву. Ссят ва дачIиннийсса велозаезд дувайссар гьарца арвахIкьини.

Дур гьарца бигьалагай кьини маркIачIан чIумул программагу: «Лига Лакии», «Кубок Лакии» турнирдайн хIадур хъанан буккайссар 15-мур школалул футболданий буккай майданнив. Командалул капитан ур СантIуев Аьлил.
«Гъи спортрал бяст-ччаллийсса тIуркIурдан къулайсса чIун дур. КIюрххил пляжрай зарядкалия байбишайссар. Яла спортрал цайми тIуркIурдахун машхулну чIун гьан дайссар. Чара бакъа самоваргу дирзун, чяй хIачIан лагма лавгнийрив, гьаз байссар шяраву дувансса давурттал масъаларттугу. Жула оьрчIангу чIалачIиссар жува буттал аьрщарал буруккинттарай бушиву. Вайннаву ппухълуннал миналухсса ччаву дишавугурхха ца мурад. ЦIанакул, ца шяраваллил оьрчIру куннан кув къакIулну яхъанахъисса заманнай, оьрчIру куннащал кув дустал хьунни. Вагу ца ххуйшивур», – тIий ур МухIаммад Юнусов.

«На вай жагьилтурайн барчаллагьрай ура, ххуйсса сипталийну ххуйну чIун гьан дуллай бур. Компьютердах бархан щябивкIуннияр, хьхьирил марцIсса гьавалия неъмат ласлай хъиннихха. Спорт нахIу лачIунсса даву дур, шяраваллил агьулданул дусшивугу цIакь дувансса», – тIий ур вайннал насихIатчи Аьбдул ХIасанхIусайнов.
Нагу бакьлай бура вайннал тIутIимуницIун.

ПатIимат Рамазанова