Масъалартту дузал бан тапшур бунни
Июльданул 10-нний Дагъусттаннал ХIукуматрал председатель МахIаммад Рамазановлул дунни лахIунтту дуцайсса зонардай ялапар хъанахъисса инсантал нигьачIаву дакъасса районнайн бизан баврил масъалалун хас дурсса батIаву.
Гьашину март-апрель зурдардий чIярусса гъараллу ларчIуну, республикалул 14 райондалий лахIунтту дуцаврия тамансса апатIру хьунни, хIатта къатри левкьсса ишругума. Яла захIматсса зараллу хьунни Дахадаевуллал райондалийсса Уркарахуллал шяраву, тикку левкьуну бия сайки 100 къатта.
Апрельданул 24-нний жаваблувсса къуллугъчитурайн тапшур бувну бивкIссар март-апрельданий ларчIун диркIсса гъараллугу хIисаврайн ларсун, республикалий нигьачIаву дусса экзоген иширттан кьимат бищун ва миннуя нанисса нигьачIаврил прогноз дуван федерал идарарттащал хIала-гьурттуну.
Мукунсса прогноз дурну дур Аьрасатнал Минприродалулгу, Роснедралулгу, «Гидроспецгеология» ФГБУ-лулгу уртакьну. Республикалун бувну бур аьркинсса кумаг. Зараллу бивсса циняв районнайн лавгун, дурну дур мероприятияртту ва оперативсса информация тIайла бувккун бур ДР-лул ХIукуматрайн.
Майрал 8-нний тапшур бувну бивкIссар лахIунтту дуцан бюхъайсса районну кIул дуван, тиккусса къатралгу, къатраву яхъанахъисса инсантуралгу аьдадругу ккаккан дурну.
«Жула республикалул нигьачIаву дусса зонардай ялапар хъанахъисса инсантал аьркинссар бизан буван, ми бизан бансса шартIругу дузал дурну. Цаппара шяраваллаву дур лахIунтту дуцавриясса нигьачIаву, жунна му асар хъанай дакъар, цанчирча жува щябивкIун бакъару аьрщаравун гьан бюхъайсса къатраву. Зун тапшурлугъру дурну диркIссар апрельданул 24-нний. Даву бакIуйн дуккан дурну дакъар, зучIа бакъар аьркинсса информация, муниципалитетирттащалсса даву къадурну дур», – увкунни МахIаммад Рамазановлул, жаваблувсса къуллугъчитурал махъру лавхъун махъ.
Премьер-министрнал тапшур бунни яла гъансса чIумул ккаккан дуван нигьачIаву диян бюхъайсса къатрал ва ялапарлувтурал сияхI, цIусса миналийн бизан баншиврул аьркин дувансса арцу ва норматив база баххана баврил хIакъиравуса предложенияртту. Циняв материаллу хIадур дуван аьркинссар августрайннин.
ХI. Аьдилов